meri justuju ka bhala hua meri justuju ka sila mila

merī justujū kā bhalā huā merī justujū kā sila milā

jo sanam kī mujh ko talāsh thī vo sanam ḳhudī meñ chhupā milā

ye hī dar thā mere nasīb kā usī dar se paayā sukūn-e-dil

usī dar se mujh ko anā milī usī dar se us kā pata milā

merā piir pīroñ kā piir hai merā piir shāhī faqīr hai

jo talab thī mere junūñ kī mujhe aur us se sivā milā

dar-e-pīr hai dar-e-mustafā dar-e-mustafā hai dar-e-ḳhudā

usī dar se samjhā rasūl ko usī dar se rāz-e-ḳhudā milā

banā aañkh un ko jo dekh le banā 'aql un ko jo jaan le

be-subūt un ko jo pā liyā use do-jahāñ kā sila milā

banā kaan un kī sadā ko sun banā nafs un kā ḳhayāl kar

jo na samjhā aise rumūz ko na ḳhudī milī na ḳhudā milā

na gila na shikve kī hājateñ na kisī se 'rizvāñ' shikāyateñ

jo bhī honā thā vo huā huā jo nasīb meñ thā milā milā

meri justuju ka bhala hua meri justuju ka sila mila

jo sanam ki mujh ko talash thi wo sanam KHudi mein chhupa mila

ye hi dar tha mere nasib ka usi dar se paya sukun-e-dil

usi dar se mujh ko ana mili usi dar se us ka pata mila

mera pir piron ka pir hai mera pir shahi faqir hai

jo talab thi mere junun ki mujhe aur us se siwa mila

dar-e-pir hai dar-e-mustafa dar-e-mustafa hai dar-e-KHuda

usi dar se samjha rasul ko usi dar se raaz-e-KHuda mila

bana aankh un ko jo dekh le bana 'aql un ko jo jaan le

be-subut un ko jo pa liya use do-jahan ka sila mila

bana kan un ki sada ko sun bana nafs un ka KHayal kar

jo na samjha aise rumuz ko na KHudi mili na KHuda mila

na gila na shikwe ki hajaten na kisi se 'rizwan' shikayaten

jo bhi hona tha wo hua hua jo nasib mein tha mila mila