gandum ko kha ke rizwan hain aise haal mein hum

gandum ko khā ke 'rizvāñ' haiñ aise haal meñ ham

pahle 'urūj par the ab haiñ zavāl meñ ham

donoñ ke do gharoñ meñ donoñ kā hai Thikāna

bait-ul-harām meñ tum bait-ul-halāl meñ ham

zāhid meñ aur ham meñ hai farq sirf itnā

vo ġhairat meñ gum hai apne ḳhayāl meñ ham

rūhoñ kī maañ kahāñ hai aur us kā naam kyā hai

muddat se ġhota-zan haiñ aise savāl meñ ham

kahte haiñ ḳhud-parastī hai ḳhud ḳhudā-parastī

ye shaġhl hai hamārā haiñ mast haal meñ ham

mai-kash bane to ḳhud kī karne lage tilāvat

rahte haiñ raat aur din apne visāl meñ ham

ham apnī āp-bītī kis ko sunā.eñ 'rizvāñ'

kyā paa.e kyā na paa.e chālīs saal meñ ham

gandum ko kha ke 'rizwan' hain aise haal mein hum

pahle 'uruj par the ab hain zawal mein hum

donon ke do gharon mein donon ka hai Thikana

bait-ul-haram mein tum bait-ul-halal mein hum

zahid mein aur hum mein hai farq sirf itna

wo ghairat mein gum hai apne KHayal mein hum

ruhon ki man kahan hai aur us ka nam kya hai

muddat se ghota-zan hain aise sawal mein hum

kahte hain KHud-parasti hai KHud KHuda-parasti

ye shaghl hai hamara hain mast haal mein hum

mai-kash bane to KHud ki karne lage tilawat

rahte hain raat aur din apne visal mein hum

hum apni aap-biti kis ko sunaen 'rizwan'

kya pae kya na pae chaalis sal mein hum