sab kuchh hai dafn mujh mein wo zinda mazar hun

sab kuchh hai dafn mujh meñ vo zinda mazār huuñ

is vāste maiñ apnī ḳhudī par nisār huuñ

har ik kā zarf dekh ke detā huuñ jām-e-rāz

yā'nī ke mai-kashoñ kā maiñ parvardigār huuñ

kis kī talab kahāñ kī talab kaisī justujū

muddat se ḳhud se milne ko maiñ be-qarār huuñ

nazroñ meñ shakl-e-yār to hāthoñ meñ jām-e-'ishq

aisā huuñ riñd aisā itā'at-guzār huuñ

rahmat mujhe pukār rahī hai ke aa idhar

kaise na vo pukārtī tasvīr-e-yār huuñ

karnī paḌī hai mujh ko tilāvat vujūd kī

goyā ke kul vujūd kā maiñ ishtihār huuñ

ganj-e-ḳhafī se niklā ka.ī sūrateñ liye

'rizvāñ' maiñ ek hī huuñ magar be-shumār huuñ

sab kuchh hai dafn mujh mein wo zinda mazar hun

is waste main apni KHudi par nisar hun

har ek ka zarf dekh ke deta hun jam-e-raaz

ya'ni ke mai-kashon ka main parwardigar hun

kis ki talab kahan ki talab kaisi justuju

muddat se KHud se milne ko main be-qarar hun

nazron mein shakl-e-yar to hathon mein jam-e-'ishq

aisa hun rind aisa ita'at-guzar hun

rahmat mujhe pukar rahi hai ke aa idhar

kaise na wo pukarti taswir-e-yar hun

karni paDi hai mujh ko tilawat wujud ki

goya ke kul wujud ka main ishtihaar hun

ganj-e-KHafi se nikla kai suraten liye

'rizwan' main ek hi hun magar be-shumar hun