uchhalta kudta qatra tha miTTi khankhanati thi

uchhaltā kūdtā qatra thā miTTī khankhanātī thī

havā thī raqs meñ aur aag ḳhud tāliyāñ bajātī thī

merī taḳhlīq jab hone lagī thī dast-e-qudrat se

anal-haq kā tarāna saut aa kar gungunātī thī

huval-avval jo chaar unsur se shai niklī vo kyā shai thī

jo aksar ādam-o-havvā meñ rah kar gudgudātī thī

bahaknā bhuul jaanā farz thā ādam-o-havvā kā

usī ġhaflat vo nādānī pe qudrat muskurātī thī

ziyāda nuur kā had se guzarnā naar ho jaanā

jabhī to sajda-e-ādam se us ko sharm aatī thī

haram ḳhāne meñ jab nūrānī qatra ho gayā dāḳhil

usī tauhīd ke qatre meñ aksar tilmilātī thī

maiñ jab ḳhalvat-kade meñ thā to dañke ho ke bajte the

anā min-nūrillāh kī nidā kānoñ meñ aatī thī

huvazzāhir huval-bātin hamārī shaan hai 'rizvāñ'

huval-avval meñ āḳhir kī tajallī jagmagātī thī

uchhalta kudta qatra tha miTTi khankhanati thi

hawa thi raqs mein aur aag KHud taliyan bajati thi

meri taKHliq jab hone lagi thi dast-e-qudrat se

anal-haq ka tarana saut aa kar gungunati thi

huwal-awwal jo chaar unsur se shai nikli wo kya shai thi

jo aksar aadam-o-hawwa mein rah kar gudgudati thi

bahakna bhul jaana farz tha aadam-o-hawwa ka

usi ghaflat wo nadani pe qudrat muskuraati thi

ziyaada nur ka had se guzarna nar ho jaana

jabhi to sajda-e-adam se us ko sharm aati thi

haram KHane mein jab nurani qatra ho gaya daKHil

usi tauhid ke qatre mein aksar tilmilati thi

main jab KHalwat-kade mein tha to danke ho ke bajte the

ana min-nurillah ki nida kanon mein aati thi

huwazzahir huwal-baatin hamari shan hai 'rizwan'

huwal-awwal mein aaKHir ki tajalli jagmagati thi