اچھلتا کودتا قطرہ تھا مٹی کھنکھناتی تھی

اچھلتا کودتا قطرہ تھا مٹی کھنکھناتی تھی

ہوا تھی رقص میں اور آگ خود تالیاں بجاتی تھی

میری تخلیق جب ہونے لگی تھی دست قدرت سے

انا الحق کا ترانہ صوت آ کر گنگناتی تھی

ہوالاول جو چار عنصر سے شئے نکلی وہ کیا شئے تھی

جو اکثر آدم و حوا میں رہ کر گدگداتی تھی

بہکنا بھول جانا فرض تھا آدم و حوا کا

اسی غفلت وہ نادانی پہ قدرت مسکراتی تھی

زیادہ نور کا حد سے گزرنا نار ہو جانا

جبھی تو سجدۂ آدم سے اس کو شرم آتی تھی

حرم خانے میں جب نورانی قطرہ ہو گیا داخل

اسی توحید کے قطرے میں اکثر تلملاتی تھی

میں جب خلوت کدے میں تھا تو ڈنکے ہو کے بجتے تھے

انا من نور اللہ کی ندا کانوں میں آتی تھی

ھو الظاہر ہوالباطن ہماری شان ہے رضواںؔ

ہوالاول میں آخر کی تجلی جگمگاتی تھی