kya bataun kya hua hai nur se

kyā batā.ūñ kyā huā hai nuur se

ḳhaak kā rishta milā hai nuur se

nuur vāloñ kā karishma dekhiye

nuur ḳhud hī jā milā hai nuur se

nuur aa kar nuur meñ zam ho gayā

nuur hī paidā huā hai nuur se

kal sarāpā ḳhud baneñge nuur ham

ham ne ye vā'da kiyā hai nuur se

paḌh anā min-nūrillāh kaun hai

ġhaur kar kyā kyā huā hai nuur se

dozaḳh-o-jannat ho yā kuchh aur ho

dosto sab kuchh banā hai nuur se

koī shai bhī nuur se ḳhālī nahīñ

aag dozaḳh meñ bharā hai nuur se

nuur hargiz naar ho saktā nahīñ

tuur phir kaise jalā hai nuur se

nuur kī 'rizvāñ' haqīqat kyā kahūñ

ḳhalq sab jalva-numā hai nuur se

kya bataun kya hua hai nur se

KHak ka rishta mila hai nur se

nur walon ka karishma dekhiye

nur KHud hi ja mila hai nur se

nur aa kar nur mein zam ho gaya

nur hi paida hua hai nur se

kal sarapa KHud banenge nur hum

hum ne ye wa'da kiya hai nur se

paDh ana min-nurillah kaun hai

ghaur kar kya kya hua hai nur se

dozaKH-o-jannat ho ya kuchh aur ho

dosto sab kuchh bana hai nur se

koi shai bhi nur se KHali nahin

aag dozaKH mein bhara hai nur se

nur hargiz nar ho sakta nahin

tur phir kaise jala hai nur se

nur ki 'rizwan' haqiqat kya kahun

KHalq sab jalwa-numa hai nur se