bagh banna use zeba hai na sahra hona

baaġh banñā use zebā hai na sahrā honā

dil kī me'arāj hai nā-kām-e-tamannā honā

aap be-parda chale aa.iye maiñ bazm meñ huuñ

mujh ko aatā hai naqāb-e-ruḳh-e-zebā honā

'umr-bhar terī tavajjoh pe rahī maut-o-hayāt

qatl karnā tujhe aayā na masīhā honā

tum ne dekhā hai kabhī sub.h kī be-nūrī ko

tum pe guzrā hai kabhī shaam kā tanhā honā

kārvāñ le ke chale aate haiñ guzre hue din

kyā qayāmat hai mire vāste tanhā honā

dil meñ qatre ke jo tūfāñ hai vo dariyā meñ kahāñ

varna dushvār na thā qatre kā dariyā honā

kyā karūñ yaad jo aa jaa.e vo maḳhmūr nazar

varna 'maikash' mujhe kyā farz thā rusvā honā

bagh banna use zeba hai na sahra hona

dil ki me'araj hai na-kaam-e-tamanna hona

aap be-parda chale aaiye main bazm mein hun

mujh ko aata hai naqab-e-ruKH-e-zeba hona

'umr-bhar teri tawajjoh pe rahi maut-o-hayat

qatl karna tujhe aaya na masiha hona

tum ne dekha hai kabhi subh ki be-nuri ko

tum pe guzra hai kabhi sham ka tanha hona

karwan le ke chale aate hain guzre hue din

kya qayamat hai mere waste tanha hona

dil mein qatre ke jo tufan hai wo dariya mein kahan

warna dushwar na tha qatre ka dariya hona

kya karun yaad jo aa jae wo maKHmur nazar

warna 'maikash' mujhe kya farz tha ruswa hona