ai dil tujhe KHabar hai ki kya kar raha hun main

ai dil tujhe ḳhabar hai ki kyā kar rahā huuñ maiñ

jo haq hai zindagī kā adā kar rahā huuñ maiñ

tum ho jafā-navāz jafā kar rahe ho tum

maiñ huuñ vafā-parast vafā kar rahā huuñ maiñ

tum se to mujh ko koī shikāyat nahīñ rahī

qismat kī ḳhūbiyoñ kā galā kar rahā huuñ maiñ

haañ dījiye sazā ki sazā-vār ishq huuñ

haañ haañ maiñ kar rahā huuñ ḳhatā kar rahā huuñ maiñ

thā din ga.e ke naġhmoñ se hai kheltā thā dil

ab naala hā-e-hosh-rubā kar rahā huuñ maiñ

ab aap apnī shān-e-karam ko dikhā.iye

merī yahi ḳhatā hai ḳhatā kar rahā huuñ maiñ

shāyad usī taraf se mile kuchh sukūn-e-zīst

pahlū se apne ġham ko judā kar rahā huuñ maiñ

'bahzād' tum bhī dekh rahe ho gavāh ho

kab se buland dast-e-duā kar rahā huuñ maiñ

ai dil tujhe KHabar hai ki kya kar raha hun main

jo haq hai zindagi ka ada kar raha hun main

tum ho jafa-nawaz jafa kar rahe ho tum

main hun wafa-parast wafa kar raha hun main

tum se to mujh ko koi shikayat nahin rahi

qismat ki KHubiyon ka gala kar raha hun main

han dijiye saza ki saza-war ishq hun

han han main kar raha hun KHata kar raha hun main

tha din gae ke naghmon se hai khelta tha dil

ab nala ha-e-hosh-ruba kar raha hun main

ab aap apni shan-e-karam ko dikhaiye

meri yahi KHata hai KHata kar raha hun main

shayad usi taraf se mile kuchh sukun-e-zist

pahlu se apne gham ko juda kar raha hun main

'bahzad' tum bhi dekh rahe ho gawah ho

kab se buland dast-e-dua kar raha hun main