اے دل تجھے خبر ہے کہ کیا کر رہا ہوں میں

اے دل تجھے خبر ہے کہ کیا کر رہا ہوں میں

جو حق ہے زندگی کا ادا کر رہا ہوں میں

تم ہو جفا نواز جفا کر رہے ہو تم

میں ہوں وفا پرست وفا کر رہا ہوں میں

تم سے تو مجھ کو کوئی شکایت نہیں رہی

قسمت کی خوبیوں کا گلا کر رہا ہوں میں

ہاں دیجئے سزا کہ سزاوار عشق ہوں

ہاں ہاں میں کر رہا ہوں خطا کر رہا ہوں میں

تھا دن گئے کہ نغموں سے ہے کھیلتا تھا دل

اب نالہ ہائے ہوشربا کر رہا ہوں میں

اب آپ اپنی شان کرم کو دکھائیے

میری یہی خطا ہے خطا کر رہا ہوں میں

شاید اسی طرف سے ملے کچھ سکون زیست

پہلو سے اپنے غم کو جدا کر رہا ہوں میں

بہزادؔ تم بھی دیکھ رہے ہو گواہ ہو

کب سے بلند دست دعا کر رہا ہوں میں