ban ke taswir-e-gham rah gae hain

ban ke tasvīr-e-ġham rah ga.e haiñ

kho.e-kho.e se ham rah ga.e haiñ

kījiye jo sitam rah ga.e haiñ

jaan dene ko ham rah ga.e haiñ

baañT liiñ sab ne aapas meñ ḳhushiyāñ

mere hisse meñ ġham rah ga.e haiñ

qāfile vaale manzil pe pahuñche

ye na dekhā ki ham rah ga.e haiñ

ab na uThnā sirhāne se mere

ab to gintī ke dam rah ga.e haiñ

allāh-allāh ye kis kī galī hai

uThte-uThte qadam rah ga.e haiñ

kā.ināt-e-jafā-o-vafā meñ

ek tum ek ham rah ga.e haiñ

dekh kar un ke mañgtoñ kī ġhairat

dañg ahl-e-karam rah ga.e haiñ

ham se allāh vaale kahāñ ab

aap jaise sanam rah ga.e haiñ

do qadam chal ke rāh-e-vafā meñ

thak ga.e tum ki ham rah ga.e haiñ

vo to aa kar ga.e bhī kabhī ke

dil pe naqsh-e-qadam rah ga.e haiñ

aaj saaqī pilā shaiḳh ko bhī

ik yahī mohtaram rah ga.e haiñ

vo ga.e jin ke dam se thī raunaq

aur rahne ko ham rah ga.e haiñ

in kī sattāriyāñ kuchh na pūchho

'āsiyoñ ke bharam rah ga.e haiñ

ai sabā ek zahmat zarā phir

in kī zulfoñ ke ḳham rah ga.e haiñ

daur-e-māzī kī tasvīr ākHir

ab 'nasīr' ek ham rah ga.e haiñ

dil 'nasīr' un kā thā le ga.e vo

ham ḳhudā kī qasam rah ga.e haiñ

ban ke taswir-e-gham rah gae hain

khoe-khoe se hum rah gae hain

kijiye jo sitam rah gae hain

jaan dene ko hum rah gae hain

banT lin sab ne aapas mein KHushiyan

mere hisse mein gham rah gae hain

qafile wale manzil pe pahunche

ye na dekha ki hum rah gae hain

ab na uThna sirhane se mere

ab to ginti ke dam rah gae hain

allah-allah ye kis ki gali hai

uThte-uThte qadam rah gae hain

kainat-e-jafa-o-wafa mein

ek tum ek hum rah gae hain

dekh kar un ke mangton ki ghairat

dang ahl-e-karam rah gae hain

hum se allah wale kahan ab

aap jaise sanam rah gae hain

do qadam chal ke rah-e-wafa mein

thak gae tum ki hum rah gae hain

wo to aa kar gae bhi kabhi ke

dil pe naqsh-e-qadam rah gae hain

aaj saqi pila shaiKH ko bhi

ek yahi mohtaram rah gae hain

wo gae jin ke dam se thi raunaq

aur rahne ko hum rah gae hain

in ki sattariyan kuchh na puchho

'asiyon ke bharam rah gae hain

ai saba ek zahmat zara phir

in ki zulfon ke KHam rah gae hain

daur-e-mazi ki taswir aakHir

ab 'nasir' ek hum rah gae hain

dil 'nasir' un ka tha le gae wo

hum KHuda ki qasam rah gae hain