banai mujh be-nawa ki bigDi nasib mera jaga diya

banā.ī mujh be-navā kī bigḌī nasīb merā jagā diyā

tire karam ke nisār tū ne mujhe bhī jiinā sikhā diyā

badal ga.ī mere dil kī duniyā 'atā ne vo martaba diyā

karam kī aisī nigāh Daalī gadā ko sultāñ banā diyā

karam ke saa.e meñ ham ko rakkhā kabhī hirāsāñ na ham hue

hamāre sar pe jo dhuup aa.ī to apnā dāman baḌhā diyā

ye inkī banda-navāziyāñ haiñ jo mujh pe aisā karam kiyā

banā ke apnā faqīr mujh ko ġham-e-jahāñ se chhuḌā diyā

ġharīb dar-dar bhaTak rahe the kahīñ na dil ko sukūñ milā

karam kiyā tū ne apne dar ko hamārā kā'ba banā diyā

vuzū kiyā maiñ ne āñso.oñ se namāz merī adā huī

milā jo naqsh-e-qadam tumhārā to maiñ ne sar ko jhukā diyā

kisī ko dar se na ḳhālī Taalā har ik savālī ko bhiik dī

ġharīb aa.e jo āstāñ par karam kā dariyā bahā diyā

rahūñ kahīñ bhī faqīr ban kar mujhe ḳhayāl-e-'fanā' nahīñ

tirī nigāh-e-karam ne mujh ko sadā payām-e-baqā diiyā

banai mujh be-nawa ki bigDi nasib mera jaga diya

tere karam ke nisar tu ne mujhe bhi jina sikha diya

badal gai mere dil ki duniya 'ata ne wo martaba diya

karam ki aisi nigah Dali gada ko sultan bana diya

karam ke sae mein hum ko rakkha kabhi hirasan na hum hue

hamare sar pe jo dhup aai to apna daman baDha diya

ye inki banda-nawaziyan hain jo mujh pe aisa karam kiya

bana ke apna faqir mujh ko gham-e-jahan se chhuDa diya

gharib dar-dar bhaTak rahe the kahin na dil ko sukun mila

karam kiya tu ne apne dar ko hamara ka'ba bana diya

wuzu kiya main ne aansoon se namaz meri ada hui

mila jo naqsh-e-qadam tumhaara to main ne sar ko jhuka diya

kisi ko dar se na KHali Tala har ek sawali ko bhik di

gharib aae jo aastan par karam ka dariya baha diya

rahun kahin bhi faqir ban kar mujhe KHayal-e-'fana' nahin

teri nigah-e-karam ne mujh ko sada payam-e-baqa diya