tera gham rahe salamat mere dil ko kya kami hai

terā ġham rahe salāmat mere dil ko kyā kamī hai

yahī merī bandagī hai yahī merī zindagī hai

terā dard merā darmāñ terā ġham merī ḳhushī hai

mujhe dard dene vaale terī zarra parvarī hai

na alam merā alam hai na ḳhushī merī ḳhushī hai

mujhe jis tarah tu rakkhe terī banda-parvarī hai

shab-e-ġham kī talḳhiyoñ ko koī us ke dil se pūchhe

terī raah takte-takte jise sub.h ho ga.ī hai

unheñ e'tibār ulfat jo na ho sakā abhī tak

maiñ samajh gayā yaqīnan abhī mujh meñ kuchh kamī hai

mere dil kā tū sahārā tū hī merī zindagī hai

ġham-e-yār tere sadqe tere dam se zindagī hai

tujhe kyā ḳhabar ai zāhid merī sajda-reziyoñ kī

merā sar vahīñ jhukā hai jahāñ ḳhatm bandagī hai

vo hujūm shor-e-mahshar jo jagā sakā na us ko

terā zikr karte-karte jise niiñd aa ga.ī hai

merī dāstān-e-ġham-gīñ koī kyā sunegā 'bāqar'

maiñ vo huuñ ki jis kī duniyā sar-e-shām luT ga.ī hai

tera gham rahe salamat mere dil ko kya kami hai

yahi meri bandagi hai yahi meri zindagi hai

tera dard mera darman tera gham meri KHushi hai

mujhe dard dene wale teri zarra parwari hai

na alam mera alam hai na KHushi meri KHushi hai

mujhe jis tarah tu rakkhe teri banda-parwari hai

shab-e-gham ki talKHiyon ko koi us ke dil se puchhe

teri rah takte-takte jise subh ho gai hai

unhen e'tibar ulfat jo na ho saka abhi tak

main samajh gaya yaqinan abhi mujh mein kuchh kami hai

mere dil ka tu sahaara tu hi meri zindagi hai

gham-e-yar tere sadqe tere dam se zindagi hai

tujhe kya KHabar ai zahid meri sajda-reziyon ki

mera sar wahin jhuka hai jahan KHatm bandagi hai

wo hujum shor-e-mahshar jo jaga saka na us ko

tera zikr karte-karte jise nind aa gai hai

meri dastan-e-gham-gin koi kya sunega 'baqar'

main wo hun ki jis ki duniya sar-e-sham luT gai hai