do-alam mein nazar aata hai jalwa sar-ba-sar apna

do-'ālam meñ nazar aatā hai jalva sar-ba-sar apnā

tamāsha dekhtā hai aap husn-e-ḳhud-nigar apnā

nigāhoñ meñ samā.eñ kyā karishme husn-e-fitrat ke

tirā jalva hai vāfir tañg-dāmān-e-nazar apnā

hameñ rāh-e-talab meñ ḳhaak ho jaane se matlab hai

qadam pahuñche na pahuñche manzil-e-maqsūd par apnā

muyassar hogā auj-e-ḳhāksārī ḳhaak meñ mil kar

falak par uḌ ke pahuñchegā ġhubār-e-muntashir apnā

havā-e-marg kī zad meñ charāġh-e-zindagānī hai

vahīñ manzil hai jis jā ḳhatm ho jaa.e safar apnā

koī parvāna jaltā hai to ro kar sham.a kahtī hai

yahī hai soz-e-ġham to ḳhātima hai tā-sahar apnā

do-'alam mein nazar aata hai jalwa sar-ba-sar apna

tamasha dekhta hai aap husn-e-KHud-nigar apna

nigahon mein samaen kya karishme husn-e-fitrat ke

tera jalwa hai wafir tang-daman-e-nazar apna

hamein rah-e-talab mein KHak ho jaane se matlab hai

qadam pahunche na pahunche manzil-e-maqsud par apna

muyassar hoga auj-e-KHaksari KHak mein mil kar

falak par uD ke pahunchega ghubar-e-muntashir apna

hawa-e-marg ki zad mein charagh-e-zindagani hai

wahin manzil hai jis ja KHatm ho jae safar apna

koi parwana jalta hai to ro kar shama kahti hai

yahi hai soz-e-gham to KHatima hai ta-sahar apna