bas unki KHushi jaanna chahta hun

bas un kī ḳhushī jānñā chāhtā huuñ

vo ḳhud jānte haiñ maiñ kyā chāhtā huuñ

sukūn-e-dil-e-mubtalā chāhtā huuñ

ġham-e-ishq kī intihā chāhtā huuñ

maiñ ḳhud apnī nisbat se kyā chāhtā huuñ

tumhārā hī chāhā huā chāhtā huuñ

vafā hī javāb-e-vafā chāhtā huuñ

junūn-e-mohabbat ye kyā chāhtā huuñ

tamannā kā mafhūm nāzuk samajh kar

tamannā se kuchh māvarā chāhtā huuñ

tire sāmne mahviyat meñ na samjhā

maiñ kyā chāhtā huuñ maiñ kyā chāhtā huuñ

zahe jalva nā-mukarrar ki har dam

tumheñ dekh kar dekhnā chāhtā huuñ

mohabbat meñ har mudda.ā se guzar kar

maiñ takmīl-e-har mudda.ā chāhtā huuñ

'zahīn' apne dil se kiyā jis ne bad-dil

vahī ġhamza-e-dil-rubā chāhtā huuñ

bas un ki KHushi jaanna chahta hun

wo KHud jaante hain main kya chahta hun

sukun-e-dil-e-mubtala chahta hun

gham-e-ishq ki intiha chahta hun

main KHud apni nisbat se kya chahta hun

tumhaara hi chaha hua chahta hun

wafa hi jawab-e-wafa chahta hun

junun-e-mohabbat ye kya chahta hun

tamanna ka mafhum nazuk samajh kar

tamanna se kuchh mawara chahta hun

tere samne mahwiyat mein na samjha

main kya chahta hun main kya chahta hun

zahe jalwa na-mukarrar ki har dam

tumhein dekh kar dekhna chahta hun

mohabbat mein har muddaa se guzar kar

main takmil-e-har muddaa chahta hun

'zahin' apne dil se kiya jis ne bad-dil

wahi ghamza-e-dil-ruba chahta hun