be-etidāliyoñ se subuk sab meñ hum hue

be-e'tidāliyoñ se subuk sab meñ ham hue

jitne ziyāda ho ga.e utne hī kam hue

pinhāñ thā daam saḳht qarīb āshiyān ke

uḌne na paa.e the ki giraftār ham hue

hastī hamārī apnī fanā par dalīl hai

yaañ tak miTe ki aap ham apnī qasam hue

saḳhtī kashān-e-ishq kī pūchhe hai kyā ḳhabar

vo log rafta rafta sarāpā alam hue

terī vafā se kyā ho talāfī ki dahr meñ

tere sivā bhī ham pe bahut se sitam hue

likhte rahe junūñ kī hikāyāt-e-ḳhūñ-chakāñ

har-chand is meñ haath hamāre qalam hue

allāh re terī tundi-e-ḳhū jis ke biim se

ajzā-e-nāla dil meñ mire rizq-e-ham hue

ahl-e-havas kī fat.h hai tark-e-nabard-e-ishq

jo paañv uTh ga.e vahī un ke alam hue

naale adam meñ chand hamāre supurd the

jo vaañ na khiñch sake so vo yaañ aa ke dam hue

chhoḌī 'asad' na ham ne gadā.ī meñ dil-lagī

saa.il hue to āshiq-e-ahl-e-karam hue

be-e'tidāliyoñ se subuk sab meñ hum hue

jitne ziyāda ho gae utne hī kam hue

pinhāñ thā dam saḳht qarīb āshiyān ke

uḌne na pae the ki giraftār hum hue

hastī hamārī apnī fanā par dalīl hai

yañ tak miTe ki aap hum apnī qasam hue

saḳhtī kashān-e-ishq kī pūchhe hai kyā ḳhabar

wo log rafta rafta sarāpā alam hue

terī wafā se kyā ho talāfī ki dahr meñ

tere siwā bhī hum pe bahut se sitam hue

likhte rahe junūñ kī hikāyāt-e-ḳhūñ-chakāñ

har-chand is meñ hath hamāre qalam hue

allāh re terī tundi-e-ḳhū jis ke bim se

ajzā-e-nāla dil meñ mere rizq-e-ham hue

ahl-e-hawas kī fath hai tark-e-nabard-e-ishq

jo pañw uTh gae wahī un ke alam hue

nale adam meñ chand hamāre supurd the

jo wañ na khiñch sake so wo yañ aa ke dam hue

chhoḌī 'asad' na hum ne gadāī meñ dil-lagī

sail hue to āshiq-e-ahl-e-karam hue