be-gana-e-irfan ko haqiqat ki KHabar kya

be-gāna-e-irfāñ ko haqīqat kī ḳhabar kyā

jo aap se vāqif na ho vo ahl-e-nazar kyā

manzūr-e-nazar kaun huā us kī ḳhabar kyā

vo fazl pe aa jaa.e to phir aib-o-hunar kyā

kis aañkh se dekhā hai ḳhudā jaane kisī ko

nā-vāqif-e-ādāb nazar terī nazar kyā

sūrat koī aisī ho ki yaad aa.e ḳhudā kī

allāh na yaad aa.e to vo husn-e-bashar kyā

vaa.iz mire dushman ko ho andesha-e-fardā

vo saath haiñ jab mere mujhe ḳhauf-o-ḳhatar kyā

ik tohmat-e-hastī se pareshāñ huuñ ab tak

be-par kī uḌī aur use lag ga.e par kyā

haq-āgahī vo haq-nagrī us kā natīja

ik shart muqaddam ke sivā fikr-o-nazar kyā

be-fikr basar hotī hai iqbāl salāmat

sarkār kā banda huuñ kisī baat kā Dar kiyā

'kāmil' ko dar-e-yār ke sajdoñ se na roko

qurbān jahāñ dil ho vahāñ qīmat-e-sar kyā

be-gana-e-irfan ko haqiqat ki KHabar kya

jo aap se waqif na ho wo ahl-e-nazar kya

manzur-e-nazar kaun hua us ki KHabar kya

wo fazl pe aa jae to phir aib-o-hunar kya

kis aankh se dekha hai KHuda jaane kisi ko

na-waqif-e-adab nazar teri nazar kya

surat koi aisi ho ki yaad aae KHuda ki

allah na yaad aae to wo husn-e-bashar kya

waiz mere dushman ko ho andesha-e-farda

wo sath hain jab mere mujhe KHauf-o-KHatar kya

ek tohmat-e-hasti se pareshan hun ab tak

be-par ki uDi aur use lag gae par kya

haq-agahi wo haq-nagri us ka natija

ek shart muqaddam ke siwa fikr-o-nazar kya

be-fikr basar hoti hai iqbaal salamat

sarkar ka banda hun kisi baat ka Dar kiya

'kaamil' ko dar-e-yar ke sajdon se na roko

qurban jahan dil ho wahan qimat-e-sar kya