ab aadmi kuchh aur hamari nazar mein hai

ab aadmī kuchh aur hamārī nazar meñ hai

jab se sunā ki yaar libās-e-bashar meñ hai

apnā hī jalva hai jo hamārī nazar meñ hai

ab ġhair kaun chashm-e-haqīqat-nigar meñ hai

vo ganj-e-husn hai dil-e-vīrāñ meñ jalva-gar

fazl-e-ḳhudā se daulat-e-kaunain ghar meñ hai

bas ik faroġh-e-naqsh-e-kaf-e-pā ke faiz se

har zarra āftāb terī rah-guzar meñ hai

allāh ḳhair mere dil-e-be-qarār kī

andāz yaas kā nigah-e-nāma-bar meñ hai

ḳhud-bībiyoñ kī aañkh milī chashm-e-shauq ko

merī nazar bhī aaj tumhārī nazar meñ hai

banñe se pahle sāġhar-e-mai TuuT jaate haiñ

kyā mohtasib kī ḳhaak kaf-e-kūza-gar meñ hai

ġhurbat meñ bhī ḳhayāl-e-vatan sāth-sāth hai

ye bhī na ho to kis kā sahārā safar meñ hai

ai nuuh apnī kashti-e-’ālam se hoshiyār

tūfān-e-girya aaj mirī chashm-e-tar meñ hai

hairān huuñ ki sajda karūñ to kidhar karūñ

kā'ba meñ bhī vahī but-e-kāfir nazar meñ hai

hañste haiñ mere girya-e-be-iḳhtiyār par

ye aap kī adā lab-e-zaḳhm-e-jigar meñ hai

'bedam' ye justujū bhī 'ajab hai 'ajab talāsh

nikle haiñ DhūñDne ko use ham jo ghar meñ hai

ab aadmi kuchh aur hamari nazar mein hai

jab se suna ki yar libas-e-bashar mein hai

apna hi jalwa hai jo hamari nazar mein hai

ab ghair kaun chashm-e-haqiqat-nigar mein hai

wo ganj-e-husn hai dil-e-viran mein jalwa-gar

fazl-e-KHuda se daulat-e-kaunain ghar mein hai

bas ek farogh-e-naqsh-e-kaf-e-pa ke faiz se

har zarra aaftab teri rah-guzar mein hai

allah KHair mere dil-e-be-qarar ki

andaz yas ka nigah-e-nama-bar mein hai

KHud-bibiyon ki aankh mili chashm-e-shauq ko

meri nazar bhi aaj tumhaari nazar mein hai

banne se pahle saghar-e-mai TuT jate hain

kya mohtasib ki KHak kaf-e-kuza-gar mein hai

ghurbat mein bhi KHayal-e-watan sath-sath hai

ye bhi na ho to kis ka sahaara safar mein hai

ai nuh apni kashti-e-’alam se hoshiyar

tufan-e-girya aaj meri chashm-e-tar mein hai

hairan hun ki sajda karun to kidhar karun

ka'ba mein bhi wahi but-e-kafir nazar mein hai

hanste hain mere girya-e-be-iKHtiyar par

ye aap ki ada lab-e-zaKHm-e-jigar mein hai

'bedam' ye justuju bhi 'ajab hai 'ajab talash

nikle hain DhunDne ko use hum jo ghar mein hai