mere hote hue koi sharik-e-imtihan kyun ho

mire hote hue koī sharīk-e-imtihāñ kyuuñ ho

tirā dard-e-mohabbat bhī nasīb-e-dushmanāñ kyuuñ ho

jo manzil tak pahuñchāyā hai to gard-e-kārvāñ kyuuñ ho

jo gard-e-kārvāñ bhī ho to gard-e-rā.igāñ kyuuñ ho

vahī bazm-e-tajallī hai vahī naġhmoñ kī be-tābī

abhī sunte haiñ ham ḳhāmosh sāz-e-kun-fakāñ kyuuñ ho

mirā hast-o-’adam jab paak hai hadd-e-ta'ayyun se

to phir tere liye qaid-e-makāñ-o-lā-makāñ kyuuñ ho

ḳhayāl-e-vasl-e-jānāñ tāle'-e-bedār dushman hai

mirī āñkhoñ tak aate aate vo ḳhvāb-e-girāñ kyuuñ ho

mirī āñkhoñ se parda hai jo dil meñ rahne vāloñ ko

taḳhayyul mo.jazan kyuuñ ho tasavvur zau-fishāñ kyuuñ ho

agar maiñ huuñ to phir tum kyā tumhārī justujū kaisī

nahīñ huuñ maiñ to mujh par mere hone kā gumāñ kyuuñ ho

vo shaidā husn-e-sūrat par fida-e-husn-e-mā’nī ham

fasāna qais kā 'bedam' hamārī dāstāñ kyuuñ ho

mere hote hue koi sharik-e-imtihan kyun ho

tera dard-e-mohabbat bhi nasib-e-dushmanan kyun ho

jo manzil tak pahunchaya hai to gard-e-karwan kyun ho

jo gard-e-karwan bhi ho to gard-e-raigan kyun ho

wahi bazm-e-tajalli hai wahi naghmon ki be-tabi

abhi sunte hain hum KHamosh saz-e-kun-fakan kyun ho

mera hast-o-’adam jab pak hai hadd-e-ta'ayyun se

to phir tere liye qaid-e-makan-o-la-makan kyun ho

KHayal-e-wasl-e-jaanan tale'-e-bedar dushman hai

meri aankhon tak aate aate wo KHwab-e-giran kyun ho

meri aankhon se parda hai jo dil mein rahne walon ko

taKHayyul mojazan kyun ho tasawwur zau-fishan kyun ho

agar main hun to phir tum kya tumhaari justuju kaisi

nahin hun main to mujh par mere hone ka guman kyun ho

wo shaida husn-e-surat par fida-e-husn-e-ma’ni hum

fasana qais ka 'bedam' hamari dastan kyun ho