chumi rikab uTh ke kisi shahsawar ki

chūmī rikāb uTh ke kisī shahsavār kī

himmat to dekhiye mire musht-e-ġhubār kī

har shai meñ dekhtā huuñ jhalak husn-e-yār kī

mushtāq ko tamīz nahīñ nūr-o-nār kī

ai iztirāb parda-e-rāz-e-nihāñ na khol

tujh ko qasam hai gosha-e-dāmān-e-yār kī

bijlī kī tarah mujh ko taḌapne se kaam hai

tasvīr huuñ maiñ apne dil-e-be-qarār kī

bād-e-sabā miTātī hai mere mazār ko

miTtī hai yādgār tire yādgār kī

achchhā huā ki hasrat-o-armān miT ga.e

ab chain se kaTegī dil-e-be-qarār kī

'bedam' jahāñ meñ sub.h-e-qayāmat hai jis kā naam

shāyad vahī sahar hai shab-e-intizār kī

chumi rikab uTh ke kisi shahsawar ki

himmat to dekhiye mere musht-e-ghubar ki

har shai mein dekhta hun jhalak husn-e-yar ki

mushtaq ko tamiz nahin nur-o-nar ki

ai iztirab parda-e-raaz-e-nihan na khol

tujh ko qasam hai gosha-e-daman-e-yar ki

bijli ki tarah mujh ko taDapne se kaam hai

taswir hun main apne dil-e-be-qarar ki

baad-e-saba miTati hai mere mazar ko

miTti hai yaadgar tere yaadgar ki

achchha hua ki hasrat-o-arman miT gae

ab chain se kaTegi dil-e-be-qarar ki

'bedam' jahan mein subh-e-qayamat hai jis ka nam

shayad wahi sahar hai shab-e-intizar ki