un ke nawik aake sine mein mere kya dekhte

un ke nāvik aake siine meñ mire kyā dekhte

dil ke har goshe meñ armānoñ kī duniyā dekhte

lutf to jab thā ki ham to dekhte un kā jamāl

aur hamārī be-ḳhudī kā vo tamāshā dekhte

baaġh meñ chhup-chhup ke jaane kā natīja mil gayā

kitne sharmā.e vo jab nargis ko dekhā dekhte

tāle'-e-bedār dikhlātā tirī sūrat to ham

dīda-e-yā'qūb se ḳhvāb-e-zuleḳhā dekhte

ashk-e-hasrat kī farāvānī bhī ik tūfān hai

yuuñ to qatra hai jo bah jaatā to dariyā dekhte

josh-e-vahshat meñ dikhāte himmat-e-dast-e-junūñ

ham agar kuchh vus'at-e-dāmān-e-sahrā dekhte

qāfile pahuñche hazāroñ manzil-e-maqsūd tak

ham akele rah ga.e naqsh-e-kaf-e-pā dekhte

dīd-e-gul ke vāste bulbul kī āñkheñ chāhiye

qais kī āñkhoñ se 'bedam' husn-e-lailā dekhte

un ke nawik aake sine mein mere kya dekhte

dil ke har goshe mein armanon ki duniya dekhte

lutf to jab tha ki hum to dekhte un ka jamal

aur hamari be-KHudi ka wo tamasha dekhte

bagh mein chhup-chhup ke jaane ka natija mil gaya

kitne sharmae wo jab nargis ko dekha dekhte

tale'-e-bedar dikhlata teri surat to hum

dida-e-ya'qub se KHwab-e-zuleKHa dekhte

ashk-e-hasrat ki farawani bhi ek tufan hai

yun to qatra hai jo bah jata to dariya dekhte

josh-e-wahshat mein dikhate himmat-e-dast-e-junun

hum agar kuchh wus'at-e-daman-e-sahra dekhte

qafile pahunche hazaron manzil-e-maqsud tak

hum akele rah gae naqsh-e-kaf-e-pa dekhte

did-e-gul ke waste bulbul ki aankhen chahiye

qais ki aankhon se 'bedam' husn-e-laila dekhte