qismat khuli hai aaj hamare mazar ki

qismat khulī hai aaj hamāre mazār kī

chādar paḌī hai gosha-e-dāmān-e-yār kī

kaisā fishār kaisī aziyyat fishār kī

lazzat milī hai qabr meñ āġhosh-e-yār kī

vahshat ye kah rahī hai dil-e-be-qarār kī

phir ḳhaak chhānñī hai hameñ kū-e-yār kī

kūche meñ tere dosh-e-sabā par savār hai

kis auj par hai ḳhaak tire ḳhāksār kī

dil bhī gayā jigar bhī gayā jaan bhī chalī

achchhī ghaḌī hai ārzū-e-vasl-e-yār kī

dar par jagah na dāman-e-dildār par qarār

miTTī ḳharāb hai mirī musht-e-ġhubār kī

nairañgī-e-zamāna se dil sair ho gayā

ab ġham ḳhizāñ kā hai na ḳhushī hai bahār kī

’ibrat se sheb-o-shabāb pe mere nazar karo

tasvīr huuñ maiñ gardish-e-lail-o-nahār kī

laao maiñ shaam hī se na kuchh khā ke so rahūñ

dekhī hai sub.h kis ne shab-e-intizār kī

vo jīte-jī to bahr 'iyādat na aa sake

ab aa rahe haiñ ḳhaak uḌāne mazār kī

na-pā.idār hastī na-pā.idār hai

hastī hī kyā hai hastī-e-nā-pā.idār kī

'bedam' na apnā naḳhl-e-tamannā harā huā

aa.ī bhī aur guzar bhī ga.ī rut bahār kī

qismat khuli hai aaj hamare mazar ki

chadar paDi hai gosha-e-daman-e-yar ki

kaisa fishaar kaisi aziyyat fishaar ki

lazzat mili hai qabr mein aaghosh-e-yar ki

wahshat ye kah rahi hai dil-e-be-qarar ki

phir KHak chhanni hai hamein ku-e-yar ki

kuche mein tere dosh-e-saba par sawar hai

kis auj par hai KHak tere KHaksar ki

dil bhi gaya jigar bhi gaya jaan bhi chali

achchhi ghaDi hai aarzu-e-wasl-e-yar ki

dar par jagah na daman-e-dildar par qarar

miTTi KHarab hai meri musht-e-ghubar ki

nairangi-e-zamana se dil sair ho gaya

ab gham KHizan ka hai na KHushi hai bahaar ki

’ibrat se sheb-o-shabab pe mere nazar karo

taswir hun main gardish-e-lail-o-nahaar ki

lao main sham hi se na kuchh kha ke so rahun

dekhi hai subh kis ne shab-e-intizar ki

wo jite-ji to bahr 'iyaadat na aa sake

ab aa rahe hain KHak uDane mazar ki

na-paidar hasti na-paidar hai

hasti hi kya hai hasti-e-na-paidar ki

'bedam' na apna naKHl-e-tamanna hara hua

aai bhi aur guzar bhi gai rut bahaar ki