hum raunaq-e-hasti ka saman luTa baiThe

ham raunaq-e-hastī kā sāmān luTā baiThe

jānāñ terī āñkhoñ pe īmān luTā baiThe

aisā thā sitamgar kā andāz-e-kHarīdārī

ham 'ishq-o-mohabbat kī dūkān luTā baiThe

ik un ke ishāre pe ham 'ishq ke dīvāne

dil pahle luTā baiThe phir jaan luTā baiThe

har chiiz zamāne kī pahle to tasadduq kī

jab kuchh na rahā baaqī īmān luTā baiThe

ham Thokareñ khāte haiñ dar-dar kī mohabbat meñ

ab shaan kahāñ baaqī ham shaan luTā baiThe

hairān hai muztar hai afsurda pareshāñ hai

ham to dil-e-muztar kī har aan luTā baiThe

īmān baḌī shai hai afsos ki īmāñ ko

ham vo bhī kisī but par qurbān luTā baiThe

ye surma-bharī āñkheñ jo rahm se ḳhālī haiñ

'bahzād' hazīñ un par īmān luTā baiThe

hum raunaq-e-hasti ka saman luTa baiThe

jaanan teri aankhon pe iman luTa baiThe

aisa tha sitamgar ka andaz-e-kHaridari

hum 'ishq-o-mohabbat ki dukan luTa baiThe

ek un ke ishaare pe hum 'ishq ke diwane

dil pahle luTa baiThe phir jaan luTa baiThe

har chiz zamane ki pahle to tasadduq ki

jab kuchh na raha baqi iman luTa baiThe

hum Thokaren khate hain dar-dar ki mohabbat mein

ab shan kahan baqi hum shan luTa baiThe

hairan hai muztar hai afsurda pareshan hai

hum to dil-e-muztar ki har aan luTa baiThe

iman baDi shai hai afsos ki iman ko

hum wo bhi kisi but par qurban luTa baiThe

ye surma-bhari aankhen jo rahm se KHali hain

'bahzad' hazin un par iman luTa baiThe