bhala apne nalon ki mujhko KHabar kya shab-e-gham hui thi kahan tak rasai

bhalā apne nāloñ kī mujh ko ḳhabar kyā shab-e-ġham huī thī kahāñ tak rasā.ī

magar ye 'adū kī zabānī sunā hai baḌī mushkiloñ se tumheñ niiñd aa.ī

shab-e-va.ada avval to aate nahīñ the jo aa.e bhī to raat aisī gañvā.ī

kabhī raat ko tum ne gesū sañvāre kabhī raat ko tum ne mehñdī lagā.ī

gila be-vafā.ī kā kis se kareñ ham hamārā gila koī suntā nahīñ hai

ḳhudā tum ko rakhe javānī ke din haiñ tumhārā zamāna tumhārī ḳhudā.ī

har ek ne diye mere ashkoñ pe tā’ne tere zulm lekin kisī ne na pūchhe

merī baat par bol uThThā zamāna tirī baat duniyā zabāñ par na laa.ī

sar-e-shām aane kā vā'da kiyā thā magar raat ab to Dhalī jā rahī hai

na jaane kahāñ raah meñ ruk ga.e vo na jaane kahāñ itnī dair lagā.ī

yahī hotī hai shirkat-e-bazm-e-mātam tamāsha samajh kar khaḌe ho ga.e tum

na hālāt marne ke pūchhe kisī se na aañsū bahā.e na mayyat uThā.ī

bhala apne nalon ki mujh ko KHabar kya shab-e-gham hui thi kahan tak rasai

magar ye 'adu ki zabani suna hai baDi mushkilon se tumhein nind aai

shab-e-wada awwal to aate nahin the jo aae bhi to raat aisi ganwai

kabhi raat ko tum ne gesu sanware kabhi raat ko tum ne mehndi lagai

gila be-wafai ka kis se karen hum hamara gila koi sunta nahin hai

KHuda tum ko rakhe jawani ke din hain tumhaara zamana tumhaari KHudai

har ek ne diye mere ashkon pe ta’ne tere zulm lekin kisi ne na puchhe

meri baat par bol uThTha zamana teri baat duniya zaban par na lai

sar-e-sham aane ka wa'da kiya tha magar raat ab to Dhali ja rahi hai

na jaane kahan rah mein ruk gae wo na jaane kahan itni dair lagai

yahi hoti hai shirkat-e-bazm-e-matam tamasha samajh kar khaDe ho gae tum

na haalat marne ke puchhe kisi se na aansu bahae na mayyat uThai