chaar tinkon ka sahaara kuchh nahin

chaar tinkoñ kā sahārā kuchh nahīñ

sahn-e-gulshan meñ hamārā kuchh nahīñ

chain luuTā dil mirā vīrāñ kiyā

bas bigāḌā hai sañvārā kuchh nahīñ

jaan dene ke liye hāzir haiñ ham

'āshiqī meñ ye ḳhasārā kuchh nahīñ

bevafā.ī bhī tirā ehsān hai

is se baḌh kar haq hamārā kuchh nahīñ

justujū īmāñ tan-āsānī gunāh

mauj sab kuchh hai kinārā kuchh nahīñ

ham se dil le kar ye zālim ne kahā

jaao rasta lo tumhārā kuchh nahīñ

ik nigāh-e-lutf ham par bhī kabhī

'arz hai apnī ijārā kuchh nahīñ

saare 'ālam meñ vahī vo haiñ 'nasīr'

sab kuchh un kā hai hamārā kuchh nahīñ

chaar tinkon ka sahaara kuchh nahin

sahn-e-gulshan mein hamara kuchh nahin

chain luTa dil mera viran kiya

bas bigaDa hai sanwara kuchh nahin

jaan dene ke liye hazir hain hum

'ashiqi mein ye KHasara kuchh nahin

bewafai bhi tera ehsan hai

is se baDh kar haq hamara kuchh nahin

justuju iman tan-asani gunah

mauj sab kuchh hai kinara kuchh nahin

hum se dil le kar ye zalim ne kaha

jao rasta lo tumhaara kuchh nahin

ek nigah-e-lutf hum par bhi kabhi

'arz hai apni ijara kuchh nahin

sare 'alam mein wahi wo hain 'nasir'

sab kuchh un ka hai hamara kuchh nahin