chahiye achchhon ko jitna chahiye

chāhiye achchhoñ ko jitnā chāhiye

ye agar chāheñ to phir kyā chāhiye

sohbat-e-rindāñ se vājib hai hazar

jā-e-mai apne ko khīñchā chāhiye

chāhne ko tere kyā samjhā thā dil

baare ab is se bhī samjhā chāhiye

chaak mat kar jaib be-ayyām-e-gul

kuchh udhar kā bhī ishārā chāhiye

dostī kā parda hai begānagī

muñh chhupānā ham se chhoḌā chāhiye

dushmanī ne merī khoyā ġhair ko

kis qadar dushman hai dekhā chāhiye

apnī rusvā.ī meñ kyā chaltī hai sa.ī

yaar hī hañgāma chāhiye chāhiye

munhasir marne pe ho jis kī umiid

nā-umīdī us kī dekhā chāhiye

ġhāfil in mah-tal’atoñ ke vāste

chāhne vaalā bhī achchhā chāhiye

chāhte haiñ ḳhūb-rūyoñ ko 'asad'

aap kī sūrat to dekhā chāhiye

chahiye achchhon ko jitna chahiye

ye agar chahen to phir kya chahiye

sohbat-e-rindan se wajib hai hazar

ja-e-mai apne ko khincha chahiye

chahne ko tere kya samjha tha dil

bare ab is se bhi samjha chahiye

chaak mat kar jaib be-ayyam-e-gul

kuchh udhar ka bhi ishaara chahiye

dosti ka parda hai beganagi

munh chhupana hum se chhoDa chahiye

dushmani ne meri khoya ghair ko

kis qadar dushman hai dekha chahiye

apni ruswai mein kya chalti hai sai

yar hi hangama chahiye chahiye

munhasir marne pe ho jis ki umid

na-umidi us ki dekha chahiye

ghafil in mah-tal’aton ke waste

chahne wala bhi achchha chahiye

chahte hain KHub-ruyon ko 'asad'

aap ki surat to dekha chahiye