jalwa dekha teri ranai ka

jalva dekhā tirī ra.anā.ī kā

kyā kalejā hai tamāshā.ī kā

rah gayā arsh se aage jā kar

haaye a.alam mirī tanhā.ī kā

yuuñ na ho barq-e-tajallī betāb

mil gayā rañg tamāshā.ī kā

yaad aatā hai vo rusvā kar ke

rañj karnā mirī rusvā.ī kā

aatī shoḳh meñ kahāñ se tamkīn

paḌ gayā sabr tamannā.ī kā

ai lab-e-yār jilā de dil meñ

vāsta apne masīhā.ī kā

roz dīdār ḳhudā ḳhair kare

ma.arka hai tirī zebā.ī kā

ab tasavvur se bhī ghabrātā huuñ

kyā maza hai mujhe tanhā.ī kā

muñh se bole to kahā ā.īna

khel khele to ḳhud-ārā.ī kā

un kī shohrat bhī miTī jaatī hai

kyā Thikānā mirī rusvā.ī kā

kyā tasavvur bhī na aane degī

muñh to dekho shab-e-tanhā.ī kā

'dāġh' kī qabr miTā kar bole

ye nishān thā isī saudā.ī kā

jalwa dekha teri ranai ka

kya kaleja hai tamashai ka

rah gaya arsh se aage ja kar

haye aalam meri tanhai ka

yun na ho barq-e-tajalli betab

mil gaya rang tamashai ka

yaad aata hai wo ruswa kar ke

ranj karna meri ruswai ka

aati shoKH mein kahan se tamkin

paD gaya sabr tamannai ka

ai lab-e-yar jila de dil mein

wasta apne masihai ka

roz didar KHuda KHair kare

marka hai teri zebai ka

ab tasawwur se bhi ghabraata hun

kya maza hai mujhe tanhai ka

munh se bole to kaha aaina

khel khele to KHud-arai ka

un ki shohrat bhi miTi jati hai

kya Thikana meri ruswai ka

kya tasawwur bhi na aane degi

munh to dekho shab-e-tanhai ka

'dagh' ki qabr miTa kar bole

ye nishan tha isi saudai ka