fatiha gor pe paDhne ko na aae koi

fātiha gor pe paḌhne ko na aa.e koī

so rahī hai mirī hasrat na jagā.e koī

ye jo hai hukm mire paas na aa.e koī

is liye ruuTh rahe haiñ ki manā.e koī

sūrat-e-ashk nazar se jo girā.e koī

ḳhaak se uTh na sakūñ laakh uThā.e koī

rahte haiñ aap to ai jaan dil-e-shaidā meñ

ka.aba-o-dair meñ kyuuñ DhūñDhne jaa.e koī

ho chukā 'aish kā jalsa to mujhe ḳhat bhejā

aap kī tarah se mehmān na bulā.e koī

haaye kis naaz se kahtā hai shab-e-vasl sanam

dekh lo bhaal lo aisā na ho aa.e koī

vo umañgoñ pe jo aa.e to sharārat ne kahā

naujavāñ haiñ unheñ parde meñ biThā.e koī

zāhido ḳhaak meñ sab zohd tumhārā mil jaa.e

chāñd-sī shakl agar tum ko dikhā.e koī

zer-e-bām is liye har roz khaḌā rahtā huuñ

aarzū hai ki ishāroñ se bulā.e koī

vo shab-e-vasl 'ajab naaz se farmāte haiñ

haath TūTeñ jo hameñ haath lagā.e koī

uThte joban ne ubhar kar ye kahā mahram se

ab nahīñ chhupne ke ham laakh chhupā.e koī

aap ne 'dāġh' ko muñh bhī na lagāyā afsos

us ko rakhtā thā kaleje se lagā.e koī

fatiha gor pe paDhne ko na aae koi

so rahi hai meri hasrat na jagae koi

ye jo hai hukm mere pas na aae koi

is liye ruTh rahe hain ki manae koi

surat-e-ashk nazar se jo girae koi

KHak se uTh na sakun lakh uThae koi

rahte hain aap to ai jaan dil-e-shaida mein

kaba-o-dair mein kyun DhunDhne jae koi

ho chuka 'aish ka jalsa to mujhe KHat bheja

aap ki tarah se mehman na bulae koi

haye kis naz se kahta hai shab-e-wasl sanam

dekh lo bhaal lo aisa na ho aae koi

wo umangon pe jo aae to shararat ne kaha

naujawan hain unhen parde mein biThae koi

zahido KHak mein sab zohd tumhaara mil jae

chand-si shakl agar tum ko dikhae koi

zer-e-baam is liye har roz khaDa rahta hun

aarzu hai ki ishaaron se bulae koi

wo shab-e-wasl 'ajab naz se farmate hain

hath TuTen jo hamein hath lagae koi

uThte joban ne ubhar kar ye kaha mahram se

ab nahin chhupne ke hum lakh chhupae koi

aap ne 'dagh' ko munh bhi na lagaya afsos

us ko rakhta tha kaleje se lagae koi