uzr aane mein bhi hai pas bulate bhi nahin

'uzr aane meñ bhī hai paas bulāte bhī nahīñ

bā'is-e-tark-e-mulāqāt batāte bhī nahīñ

mujh se lāġhar tirī nazroñ meñ khaTakte hī rahe

tujh se nāzuk mirī āñkhoñ meñ samāte bhī nahīñ

kHuub parda hai ki chilman se lage baiThe haiñ

saaf chhupte bhī nahīñ sāmne aate bhī nahīñ

ho chukā qat-e’-ta’alluq to jafā.eñ kyuuñ haiñ

jis se matlab nahīñ rahtā hai satāte bhī nahīñ

dekhte hī mujhe mahfil meñ ye irshād huā

kaun baiThā hai use log uThāte bhī nahīñ

muntazir haiñ dam-e-ruḳhsat ki ye mar jaaye to jaa.eñ

phir ye ehsān ki ham chhoḌ ke jaate bhī nahīñ

kam-sinī kā ye taqāzā ki janāze pe mire

paas aate bhī nahīñ haath lagāte bhī nahīñ

ziist se tañg ho ai 'dāġh' to jiite kyuuñ ho

jaan pyārī bhī nahīñ jaan se jaate bhī nahīñ

'uzr aane mein bhi hai pas bulate bhi nahin

ba'is-e-tark-e-mulaqat batate bhi nahin

mujh se laghar teri nazron mein khaTakte hi rahe

tujh se nazuk meri aankhon mein samate bhi nahin

kHub parda hai ki chilman se lage baiThe hain

saf chhupte bhi nahin samne aate bhi nahin

ho chuka qat-e’-ta’alluq to jafaen kyun hain

jis se matlab nahin rahta hai satate bhi nahin

dekhte hi mujhe mahfil mein ye irshad hua

kaun baiTha hai use log uThate bhi nahin

muntazir hain dam-e-ruKHsat ki ye mar jaye to jaen

phir ye ehsan ki hum chhoD ke jate bhi nahin

kam-sini ka ye taqaza ki janaze pe mere

pas aate bhi nahin hath lagate bhi nahin

zist se tang ho ai 'dagh' to jite kyun ho

jaan pyari bhi nahin jaan se jate bhi nahin