ajab apna haal hota jo visal-e-yar hota

'ajab apnā haal hotā jo visāl-e-yār hotā

kabhī jaan sadqe hotī kabhī dil nisār hotā

koī fitna tā-qiyāmat na phir āshkār hotā

tire dil pe kaash zālim mujhe iḳhtiyār hotā

jo tumhārī tarah tum se koī jhūTā va.ada karatā

tumhīñ munsifī se kah do tumheñ e'tibār hotā

ye mazā thā dil lagī kā ki barābar aag lagtī

na tujhe qarār hotā na mujhe qarār hotā

ye dard-e-dil nahīñ hai ki ho chāra-sāz koī

agar ek baar miTtā to hazār baar hotā

tire va.ada par sitam-gar abhī aur sabr karte

agar apnī zindagī kā hameñ e'tibār hotā

ġham-e-ishq meñ mazā thā jo use samajh ke khāte

ye vo zahar hai ki āḳhir mai-e-ḳhush-gavār hotā

ga.e hosh tere zāhid jo vo chashm-e-mast dekhī

mujhe kyā ulaT na dete jo na bāda-ḳhvār hotā

tumheñ naaz ho na kyuuñ kar ki liyā hai 'dāġh' kā dil

ye raqam na haath lagtī na ye iftiḳhār hotā

'ajab apna haal hota jo visal-e-yar hota

kabhi jaan sadqe hoti kabhi dil nisar hota

koi fitna ta-qiyamat na phir aashkar hota

tere dil pe kash zalim mujhe iKHtiyar hota

jo tumhaari tarah tum se koi jhuTa wada karata

tumhin munsifi se kah do tumhein e'tibar hota

ye maza tha dil lagi ka ki barabar aag lagti

na tujhe qarar hota na mujhe qarar hota

ye dard-e-dil nahin hai ki ho chaara-saz koi

agar ek bar miTta to hazar bar hota

tere wada par sitam-gar abhi aur sabr karte

agar apni zindagi ka hamein e'tibar hota

gham-e-ishq mein maza tha jo use samajh ke khate

ye wo zahar hai ki aaKHir mai-e-KHush-gawar hota

gae hosh tere zahid jo wo chashm-e-mast dekhi

mujhe kya ulaT na dete jo na baada-KHwar hota

tumhein naz ho na kyun kar ki liya hai 'dagh' ka dil

ye raqam na hath lagti na ye iftiKHar hota