dost kyun ishq mein karte hain shikayat meri

dost kyuuñ 'ishq meñ karte haiñ shikāyat merī

mujh pe kyā zor kisī kā hai tabī.at merī

dhuum hai zer-e-zamīñ kushta-e-nāz aayā hai

ho ga.ī ii.d shahīdoñ ko ziyārat merī

sar se pahle vo zabāñ kaaT liyā karte haiñ

ki ḳhudā se na kare koī shikāyat merī

nā-tavāñ dekh ke afsos na aayā mujh par

vo ḳhafā haiñ ki uḌaa.ī hai nazākat merī

kyā judā.ī kā asar hai ki shab-e-tanhā.ī

merī tasvīr se miltī nahīñ sūrat merī

jis tarah tū merī āġhosh se niklā ai shoḳh

yūñhī hāthoñ se nikaltī hai tabī'at merī

be-hayā hote haiñ mehmān kahīñ aise bhī

ki nikāle se nikaltī nahīñ hasrat merī

apnī tasvīr pe nāzāñ ho tumhārā kyā hai

aañkh nargis kī dahan ġhuncha kā hasrat merī

kahīñ duniyā meñ Thikānā nahīñ us kā ai 'dāġh'

chhoḌ kar mujh ko kahāñ jaa.e musībat merī

dost kyun 'ishq mein karte hain shikayat meri

mujh pe kya zor kisi ka hai tabiat meri

dhum hai zer-e-zamin kushta-e-naz aaya hai

ho gai id shahidon ko ziyarat meri

sar se pahle wo zaban kaT liya karte hain

ki KHuda se na kare koi shikayat meri

na-tawan dekh ke afsos na aaya mujh par

wo KHafa hain ki uDai hai nazakat meri

kya judai ka asar hai ki shab-e-tanhai

meri taswir se milti nahin surat meri

jis tarah tu meri aaghosh se nikla ai shoKH

yunhi hathon se nikalti hai tabi'at meri

be-haya hote hain mehman kahin aise bhi

ki nikale se nikalti nahin hasrat meri

apni taswir pe nazan ho tumhaara kya hai

aankh nargis ki dahan ghuncha ka hasrat meri

kahin duniya mein Thikana nahin us ka ai 'dagh'

chhoD kar mujh ko kahan jae musibat meri