is bazm mein sharik to jaya na jaega

is bazm meñ sharīk to jaayā na jā.egā

maiñ jā.ūñgā agar mirā saayā na jā.egā

dil le ke us kī bazm meñ jaayā na jā.egā

ye mudda.ī baġhal meñ chhupāyā na jā.egā

ai hashr imtiyāz ki ham haiñ shahīd-e-nāz

murdoñ kī tarah ham ko uThāyā na jā.egā

dil kyā milāoge ki hameñ ho gayā yaqīn

tum se to ḳhaak meñ bhī milāyā na jā.egā

jo dil dikhā rahā hai maza har ghaḌī mujhe

āñkhoñ se sau baras bhī dikhāyā na jā.egā

dushman ke aage sar na jhukegā kisī tarah

ye āsmān zamīn se milāyā na jā.egā

fitna nahīñ huuñ jis ko uThāyā kare falak

mujh se gire hue ko uThāyā na jā.egā

zulfeñ nahīñ ki shāne se ārāsta kiyā

bigḌā huā mizāj banāyā na jā.egā

ai 'dāġh' tujh ko rizq kī ḳhvāhish hai charḳh se

utnā ye ġham khilā.egā khāyā na jā.egā

is bazm mein sharik to jaya na jaega

main jaunga agar mera saya na jaega

dil le ke us ki bazm mein jaya na jaega

ye muddai baghal mein chhupaya na jaega

ai hashr imtiyaz ki hum hain shahid-e-naz

murdon ki tarah hum ko uThaya na jaega

dil kya milaoge ki hamein ho gaya yaqin

tum se to KHak mein bhi milaya na jaega

jo dil dikha raha hai maza har ghaDi mujhe

aankhon se sau baras bhi dikhaya na jaega

dushman ke aage sar na jhukega kisi tarah

ye aasman zamin se milaya na jaega

fitna nahin hun jis ko uThaya kare falak

mujh se gire hue ko uThaya na jaega

zulfen nahin ki shane se aarasta kiya

bigDa hua mizaj banaya na jaega

ai 'dagh' tujh ko rizq ki KHwahish hai charKH se

utna ye gham khilaega khaya na jaega