ya to aisi mehrbani mujh pe ya kuchh bhi nahin

yā to aisī mehrbānī mujh pe yā kuchh bhī nahīñ

ibtidā hī ibtidā thī intihā kuchh bhī nahīñ

dekh kar tasvīr-e-yūsuf kah diyā kuchh bhī nahīñ

aap hī sab kuchh haiñ goyā duur kuchh bhī nahīñ

pūchhne vāloñ ne mere naak meñ dam kar diyā

jis ne pūchhā haal merā kah diyā kuchh bhī nahīñ

un ko ḳhat likkhā hai so pahlū bachā kar ḳhauf se

hai 'ibārat hī 'ibārat mudda'ā kuchh bhī nahīñ

saikḌoñ diiñ jhiḌkiyāñ mujh ko hazāroñ gāliyāñ

aur phir kahte ho maiñ ne to kahā kuchh bhī nahīñ

sun ke hāl-e-dil merā rakhte haiñ vo kānoñ pe haath

haaye is andāz se goyā sunā kuchh bhī nahīñ

tum agar be-dād-gar ho to ḳhudā hai dād-gar

ye na samjho purshish-e-roz-e-jazā kuchh bhī nahīñ

aage us begāna-vash ke hech hai sab koī

āshnā kuchh bhī nahīñ nā-āshnā kuchh bhī nahīñ

be-ḳhudī hai vasl meñ yā chhā.ī hai terī hayā

dekhtā sab kuchh huuñ lekin sūjhtā kuchh bhī nahīñ

apne dam ko aadmī har dam ġhanīmat jaan le

ḳhaak kā phir Dher hai bā'd-e-fanā kuchh bhī nahīñ

tū ne qassam-e-azal ġhairoñ ko kyā-kyā kuchh diyā

'dāġh' hai mahrūm us ke naam kā kuchh bhī nahīñ

ya to aisi mehrbani mujh pe ya kuchh bhi nahin

ibtida hi ibtida thi intiha kuchh bhi nahin

dekh kar taswir-e-yusuf kah diya kuchh bhi nahin

aap hi sab kuchh hain goya dur kuchh bhi nahin

puchhne walon ne mere nak mein dam kar diya

jis ne puchha haal mera kah diya kuchh bhi nahin

un ko KHat likkha hai so pahlu bacha kar KHauf se

hai 'ibarat hi 'ibarat mudda'a kuchh bhi nahin

saikDon din jhiDkiyan mujh ko hazaron galiyan

aur phir kahte ho main ne to kaha kuchh bhi nahin

sun ke haal-e-dil mera rakhte hain wo kanon pe hath

haye is andaz se goya suna kuchh bhi nahin

tum agar be-dad-gar ho to KHuda hai dad-gar

ye na samjho purshish-e-roz-e-jaza kuchh bhi nahin

aage us begana-wash ke hech hai sab koi

aashna kuchh bhi nahin na-ashna kuchh bhi nahin

be-KHudi hai wasl mein ya chhai hai teri haya

dekhta sab kuchh hun lekin sujhta kuchh bhi nahin

apne dam ko aadmi har dam ghanimat jaan le

KHak ka phir Dher hai ba'd-e-fana kuchh bhi nahin

tu ne qassam-e-azal ghairon ko kya-kya kuchh diya

'dagh' hai mahrūm us ke nam ka kuchh bhi nahin