ye puchho dil se sharmili nigah-e-yar kaisi hai

ye pūchho dil se sharmīlī nigāh-e-yār kaisī hai

kare jo maiñ hī meñ kaam vo talvār kaisī hai

tumhārī chaal kī ham miTne vaale daad kyā deñge

qayāmat se zarā pūchho merī raftār kaisī hai

nigāh-e-tez meñ us ke chamak jaatī hai bijlī sī

ilāhī ḳhair ye talvāreñ talvār kaisī hai

tarastī thiiñ kisī dīdār ko ye ek muddat se

ab in āñkhoñ se pūchho lazzat-e-dīdār kaisī hai

dikhā kar teġh ba-rū-nāz se kahte haiñ vo dekho

ye kaisī hai ye kaisī hai merī talvār kaisī hai

mujhe tum dekhte hī gāliyoñ par kyuuñ utar aa.e

bhare baiThe the kyā mahfil meñ ye bharmār kaisī hai

rahā jaatā hai dil se harf-e-matlab lab talak aa kar

zarā sī baat hai lekin mujhe dushvār kaisī hai

samāte hī nazar meñ saaf utrī hai mere dil se

tirī tasvīr kī bhī shoḳhī-e-raftār kaisī hai

taġhāful se na ho pursish to phir ai 'dāġh' kyā kiije

batā.ūñ hālat aisī hai jo pūchhe yaar kaisī hai

ye puchho dil se sharmili nigah-e-yar kaisi hai

kare jo main hi mein kaam wo talwar kaisi hai

tumhaari chaal ki hum miTne wale dad kya denge

qayamat se zara puchho meri raftar kaisi hai

nigah-e-tez mein us ke chamak jati hai bijli si

ilahi KHair ye talwaren talwar kaisi hai

tarasti thin kisi didar ko ye ek muddat se

ab in aankhon se puchho lazzat-e-didar kaisi hai

dikha kar tegh ba-ru-naz se kahte hain wo dekho

ye kaisi hai ye kaisi hai meri talwar kaisi hai

mujhe tum dekhte hi galiyon par kyun utar aae

bhare baiThe the kya mahfil mein ye bharmar kaisi hai

raha jata hai dil se harf-e-matlab lab talak aa kar

zara si baat hai lekin mujhe dushwar kaisi hai

samate hi nazar mein saf utri hai mere dil se

teri taswir ki bhi shoKHi-e-raftar kaisi hai

taghaful se na ho pursish to phir ai 'dagh' kya kije

bataun haalat aisi hai jo puchhe yar kaisi hai