یہ پوچھو دل سے شرمیلی نگاہ یار کیسی ہے

یہ پوچھو دل سے شرمیلی نگاہ یار کیسی ہے

کرے جو میں ہی میں کام وہ تلوار کیسی ہے

تمہاری چال کی ہم مٹنے والے داد کیا دیں گے

قیامت سے ذرا پوچھو میری رفتار کیسی ہے

نگاہ تیز میں اس کے چمک جاتی ہے بجلی سی

الٰہی خیر یہ تلواریں تلوار کیسی ہے

ترستی تھیں کسی دیدار کو یہ ایک مدت سے

اب ان آنکھوں سے پوچھو لذت دیدار کیسی ہے

دکھا کر تیغ برو ناز سے کہتے ہیں وہ دیکھو

یہ کیسی ہے یہ کیسی ہے میری تلوار کیسی ہے

مجھے تم دیکھتے ہی گالیوں پر کیوں اتر آئے

بھرے بیٹھے تھے کیا محفل میں یہ بھرمار کیسی ہے

رہا جاتا ہے دل سے حرف مطلب لب تلک آ کر

ذرا سی بات ہے لیکن مجھے دشوار کیسی ہے

سماتے ہی نظر میں صاف اتری ہے میرے دل سے

تری تصویر کی بھی شوخئ رفتار کیسی ہے

تغافل سے نہ ہو پرسش تو پھر اے داغؔ کیا کیجے

بتاؤں حالت ایسی ہے جو پوچھے یار کیسی ہے