rahega koi to tegh-e-sitam ki yaadgaron mein

rahegā koī to teġh-e-sitam kī yādgāroñ meñ

mire lāshe ke TukḌe dafn karnā sau mazāroñ meñ

kisī kī nargis-e-maḳhmūr kuchh kah de ishāroñ meñ

mazā hai rāt-din chalte rahe parhezgāroñ meñ

vo ġhuncha huuñ shagufta dil rahā 'ālam kī ḳhāroñ meñ

vo kāñTā huuñ na khaTkā maiñ kisī ko gul-ezāroñ meñ

junūñ meñ dekhiye maidān kis ke haath rahtā hai

paḌe hai ābloñ meñ phuuT aur ekā hai ḳhāroñ meñ

baḌī tamkīn meñ kuchh shoḳhī to kuchh shoḳhī meñ be-tābī

hue tum aur se kuchh aur aakar be-qarāroñ meñ

vo sharmā.ī huī āñkheñ vo ghabrā.ī huī bāteñ

nikal kar ghar se vo ghirnā tirā ummīd-vāroñ meñ

'iyādat ke liye vo be-ḳhabar aayā ki maut aa.ī

ishāre ho ga.e kaise mere tīmār-dāroñ meñ

ajal kā naam leñ taqdīr ko ro.eñ mujhe koseñ

mire qātil kā charchā kyuuñ hai mere sogvāroñ meñ

dil apnā kis kā shaidā hai tumhārā vālā-o-shaidā

ye kis ke jāñ-nisāroñ meñ tumhār jāñ-nisāroñ meñ

palak uThtī nahīñ merī taraf kyā thak ga.iiñ āñkheñ

abhī to ho rahī thiiñ ġhair se bāteñ ishāroñ meñ

koī jannat kā ḳhvāhāñ hai koī kausar kā tālib hai

uḌā kartī hai be-par kī hamesha bāda-ḳhvāroñ meñ

huā hai ġhair ke taalā meñ kyā sābit ye sayyāra

nishān-e-mushtarī miltā nahīñ mere sitāroñ meñ

jo ham ujḌe huoñ par mehrbāñ ho charḳh ai gulchīñ

bajā.e barg paidā hoñ nasheman shāḳh-sāroñ meñ

phirā jaatā hai us but kī taraf ruḳh ahl-e-īmāñ kā

musalmāñ apne qible se na muñh phereñ hazāroñ meñ

ḳhafā hote ho kyuuñ ’ahd-e-vafā ke zikr par sach hai

na tum va.ada-kHilāfoñ meñ na ham be-e'tibāroñ meñ

ġhazab hai aur bhī is sādgī par mar ga.e lākhoñ

kahā thā kis ne ban baiTheñ vo mere sogvāroñ meñ

mile kyā tiir har-har zaḳhm meñ hai chuur ai qātil

ajal ke hosh gum hote haiñ tere dil-figāroñ meñ

jalānā 'dāġh' kā achchhā nahīñ ye dam ġhanīmat hai

ki aisā vafā ik aadh niklegā hazāroñ meñ

rahega koi to tegh-e-sitam ki yaadgaron mein

mere lashe ke TukDe dafn karna sau mazaron mein

kisi ki nargis-e-maKHmur kuchh kah de ishaaron mein

maza hai raat-din chalte rahe parhezgaron mein

wo ghuncha hun shagufta dil raha 'alam ki KHaron mein

wo kanTa hun na khaTka main kisi ko gul-ezaron mein

junun mein dekhiye maidan kis ke hath rahta hai

paDe hai aablon mein phuT aur eka hai KHaron mein

baDi tamkin mein kuchh shoKHi to kuchh shoKHi mein be-tabi

hue tum aur se kuchh aur aakar be-qararon mein

wo sharmai hui aankhen wo ghabrai hui baaten

nikal kar ghar se wo ghirna tera ummid-waron mein

'iyaadat ke liye wo be-KHabar aaya ki maut aai

ishaare ho gae kaise mere timar-daron mein

ajal ka nam len taqdir ko roen mujhe kosen

mere qatil ka charcha kyun hai mere sogwaron mein

dil apna kis ka shaida hai tumhaara wala-o-shaida

ye kis ke jaan-nisaron mein tumhaar jaan-nisaron mein

palak uThti nahin meri taraf kya thak gain aankhen

abhi to ho rahi thin ghair se baaten ishaaron mein

koi jannat ka KHwahan hai koi kausar ka talib hai

uDa karti hai be-par ki hamesha baada-KHwaron mein

hua hai ghair ke tala mein kya sabit ye sayyara

nishan-e-mushtari milta nahin mere sitaron mein

jo hum ujDe huon par mehrban ho charKH ai gulchin

bajae barg paida hon nasheman shaKH-saron mein

phira jata hai us but ki taraf ruKH ahl-e-iman ka

musalman apne qible se na munh pheren hazaron mein

KHafa hote ho kyun ’ahd-e-wafa ke zikr par sach hai

na tum wada-kHilafon mein na hum be-e'tibaron mein

ghazab hai aur bhi is sadgi par mar gae lakhon

kaha tha kis ne ban baiThen wo mere sogwaron mein

mile kya tir har-har zaKHm mein hai chur ai qatil

ajal ke hosh gum hote hain tere dil-figaron mein

jalana 'dagh' ka achchha nahin ye dam ghanimat hai

ki aisa wafa ek aadh niklega hazaron mein