jala tha dil jab kiya tha nala jalenge lab jab dua karenge

jalā thā dil jab kiyā thā naala jaleñge lab jab du'ā kareñge

jo vo kiyā thā to kiyā thā jo ye kareñge to kyā kareñge

maza usī meñ hai dil-lagī kā ki shoḳhiyāñ hoñ sharārteñ hoñ

jo aap ham se hayā kareñge to chheḌ kar ham jafā kareñge

'ajab tarh mu'āmala hai vo sochte haiñ ye baat pahroñ

kabhī tama' hai ki lījiye dil kabhī ye hai fikr kyā kareñge

'adāvat un ko hai aaj jis se usī pe kul mehrbāniyāñ haiñ

jo dushmanī kar sakeñ na puurī vo dostī ham se kyā kareñge

hazār haiñ rañg 'āshiqī ke jo in ko barte vo in ko jaane

tumhīñ ko ham be-vafā kaheñge tumheñ se ham iltijā kareñge

payām-bar kī majāl kyā thī jo un se kah kar javāb laatā

bahut sunī ham ne aisī bāteñ bahut sī aisī sunā kareñge

hue haiñ vo ḳhūgar-e-jafā ham ye kahte phirte haiñ jā-bajā ham

jo koī ham par sitam karegā ham us ke haq meñ du'ā kareñge

jo rashk-e-luqmāñ bhī chāra-gar ho masīh-e-sānī bhī vo agar ho

kisī se achchhe hue na hoñge ham aap apnī davā kareñge

ḳhatā karoge jo bosa māñgā ye kyā kahā phir na ham se kahnā

ḳhatā kareñge ḳhatā kareñge ḳhatā kareñge ḳhatā kareñge

koī sahe ranj-o-ġham kahāñ tak uThā.e zulm-o-sitam kahāñ tak

vo hazrat-e-'dāġh' hī nahīñ ab jo ham se mehr-o-vafā kareñge

jala tha dil jab kiya tha nala jalenge lab jab du'a karenge

jo wo kiya tha to kiya tha jo ye karenge to kya karenge

maza usi mein hai dil-lagi ka ki shoKHiyan hon shararten hon

jo aap hum se haya karenge to chheD kar hum jafa karenge

'ajab tarh mu'amala hai wo sochte hain ye baat pahron

kabhi tama' hai ki lijiye dil kabhi ye hai fikr kya karenge

'adawat un ko hai aaj jis se usi pe kul mehrbaniyan hain

jo dushmani kar saken na puri wo dosti hum se kya karenge

hazar hain rang 'ashiqi ke jo in ko barte wo in ko jaane

tumhin ko hum be-wafa kahenge tumhein se hum iltija karenge

payam-bar ki majal kya thi jo un se kah kar jawab lata

bahut suni hum ne aisi baaten bahut si aisi suna karenge

hue hain wo KHugar-e-jafa hum ye kahte phirte hain ja-baja hum

jo koi hum par sitam karega hum us ke haq mein du'a karenge

jo rashk-e-luqman bhi chaara-gar ho masih-e-sani bhi wo agar ho

kisi se achchhe hue na honge hum aap apni dawa karenge

KHata karoge jo bosa manga ye kya kaha phir na hum se kahna

KHata karenge KHata karenge KHata karenge KHata karenge

koi sahe ranj-o-gham kahan tak uThae zulm-o-sitam kahan tak

wo hazrat-e-'dagh' hi nahin ab jo hum se mehr-o-wafa karenge