falak deta hai jinko aish un ko gham bhi hote hain

falak detā hai jin ko 'aish un ko ġham bhī hote haiñ

jahāñ bajte haiñ naqqāre vahāñ mātam bhī hote haiñ

gile shikve kahāñ tak hoñge aadhī raat to guzrī

pareshāñ tum bhī hote ho pareshāñ ham bhī hote haiñ

jo rakhe chāragar kāfūr-e-dūnī aag lag jaa.e

kahīñ ye zaḳhm-e-dil sharminda-e-marham bhī hote haiñ

vo āñkheñ sāmrī-fan haiñ vo lab-'īsā qafas dekho

mujh par sahar hote haiñ mujh par dam bhī hote haiñ

ba-zāhir rahnumā haiñ aur dil meñ bad-gumānī hai

tire kūcha meñ jo jaatā hai aage ham bhī hote haiñ

hamāre āñsuoñ kī āb-dārī aur hī kuchh hai

ki yuuñ hone ko raushan gauhar-e-shabnam bhī hote haiñ

kisī kā va.ada-e-dīdār to ai 'dāġh' bar-haq hai

magar ye dekhiye dil shaad us din ham bhī hote haiñ

falak deta hai jin ko 'aish un ko gham bhi hote hain

jahan bajte hain naqqare wahan matam bhi hote hain

gile shikwe kahan tak honge aadhi raat to guzri

pareshan tum bhi hote ho pareshan hum bhi hote hain

jo rakhe chaaragar kafur-e-duni aag lag jae

kahin ye zaKHm-e-dil sharminda-e-marham bhi hote hain

wo aankhen samri-fan hain wo lab-'isa qafas dekho

mujh par sahar hote hain mujh par dam bhi hote hain

ba-zahir rahnuma hain aur dil mein bad-gumani hai

tere kucha mein jo jata hai aage hum bhi hote hain

hamare aansuon ki aab-dari aur hi kuchh hai

ki yun hone ko raushan gauhar-e-shabnam bhi hote hain

kisi ka wada-e-didar to ai 'dagh' bar-haq hai

magar ye dekhiye dil shad us din hum bhi hote hain