kaha na kuchh ’arz-e-mudda’a par wo le rahe dam ko muskura kar

kahā na kuchh 'arz-e-mudda'ā par vo le rahe dam ko muskurā kar

sunā kiye haal chupke-chupke nazar uThā.ī na sar uThā kar

na tuur dekhe na rañg barte ġhazab meñ aayā huuñ dil lagā kar

vagar na detā hai dil zamāna ye aazmā kar vo aazmā kar

tabīb kahte haiñ kuchh davā kar habīb kahte haiñ bas du'ā kar

raqīb karte haiñ bas iltijā kar ġhazab meñ aayā huuñ dil lagā kar

tirī mohabbat ne maar Daalā hazār iizā se mujh ko zālim

rulā-rulā kar ghulā-ghulā kar jalā-jalā kar miTā-miTā kar

tum hī to ho jo ki ḳhvāb meñ ho tum hī to ho jo ḳhayāl meñ ho

kahāñ chale aañkh meñ samā kar kidhar ko jaate ho dil meñ aakar

na har bashar kā jamāl aisā na har farishte kā haal aisā

kuchh aur se aur ho gayā tū mirī nazar meñ samā-samā kar

ḳhudā kā milnā bahut hai āsāñ butoñ kā milnā hai saḳht mushkil

yaqīñ nahīñ gar kisī ko hamdam to koī laa.e use manā kar

janāb-e-sultān 'ishq vo hai kare jo ai 'dāġh' ik ishāra

farishte hāzir hoñ dast-basta adab se gardan jhukā-jhukā kar

kaha na kuchh 'arz-e-mudda'a par wo le rahe dam ko muskura kar

suna kiye haal chupke-chupke nazar uThai na sar uTha kar

na tur dekhe na rang barte ghazab mein aaya hun dil laga kar

wagar na deta hai dil zamana ye aazma kar wo aazma kar

tabib kahte hain kuchh dawa kar habib kahte hain bas du'a kar

raqib karte hain bas iltija kar ghazab mein aaya hun dil laga kar

teri mohabbat ne mar Dala hazar iza se mujh ko zalim

rula-rula kar ghula-ghula kar jala-jala kar miTa-miTa kar

tum hi to ho jo ki KHwab mein ho tum hi to ho jo KHayal mein ho

kahan chale aankh mein sama kar kidhar ko jate ho dil mein aakar

na har bashar ka jamal aisa na har farishte ka haal aisa

kuchh aur se aur ho gaya tu meri nazar mein sama-sama kar

KHuda ka milna bahut hai aasan buton ka milna hai saKHt mushkil

yaqin nahin gar kisi ko hamdam to koi lae use mana kar

janab-e-sultan 'ishq wo hai kare jo ai 'dagh' ek ishaara

farishte hazir hon dast-basta adab se gardan jhuka-jhuka kar