milte hi be-bak thi wo aankh sharmai hui

milte hī be-bāk thī vo aañkh sharmā.ī huī

phir ga.ī pachhtā ke palkoñ tak hayā aa.ī huī

har adā mastāna sar se paañv tak chhā.ī huī

uff tirī kāfir javānī josh par aa.ī huī

mujh ko ye da.ava koī tere sivā dil meñ nahīñ

un ko ye ilzām achchhī qaid-e-tanhā.ī huī

Tok kar raste meñ pyaar aahī gayā us shoḳh par

vo nazar hairat-zada vo baat ghabrā.ī huī

ye milā zikr qiyāmat par qiyāmat kā javāb

kyā uThegī vo hamārī Thokareñ khaa.ī huī

tauba kar zāhid karūñ tauba maiñ aise vaqt meñ

ye bahār aa.ī huī aisī ghaTā chhā.ī huī

bholī sūrat par tirī tasvīr kā vo bāñkpan

lab pe zāhir hai tabassum dil meñ itrā.ī huī

dekh kar qātil kī aamad 'dāġh' dil meñ shaad shaad

aur ġham-ḳhvāroñ ke muñh par murdanī chhā.ī huī

milte hi be-bak thi wo aankh sharmai hui

phir gai pachhta ke palkon tak haya aai hui

har ada mastana sar se panw tak chhai hui

uff teri kafir jawani josh par aai hui

mujh ko ye dawa koi tere siwa dil mein nahin

un ko ye ilzam achchhi qaid-e-tanhai hui

Tok kar raste mein pyar aahi gaya us shoKH par

wo nazar hairat-zada wo baat ghabrai hui

ye mila zikr qiyamat par qiyamat ka jawab

kya uThegi wo hamari Thokaren khai hui

tauba kar zahid karun tauba main aise waqt mein

ye bahaar aai hui aisi ghaTa chhai hui

bholi surat par teri taswir ka wo bankpan

lab pe zahir hai tabassum dil mein itrai hui

dekh kar qatil ki aamad 'dagh' dil mein shad shad

aur gham-KHwaron ke munh par murdani chhai hui