ajab apna haal hota jo visal-e-yar hota

'ajab apnā haal hotā jo visāl-e-yār hotā

kabhī jaan sadqe hotī kabhī dil nisār hotā

koī fitna tā-qiyāmat na phir āshkār hotā

tire dil pe kaash zālim mujhe iḳhtiyār hotā

jo tumhārī tarah tum se koī jhūTe va.ada karatā

tumhīñ munsifī se kah do tumheñ e'tibār hotā

ye maza thā dil lagī kā ki barābar aag lagtī

na tujhe qarār kar hotā na mujhe qarār hotā

tire va.ade par sitam-gar abhī aur sabr karte

hameñ apnī zindagī kā agar e'tibār hotā

ye vo dard-e-dil nahīñ hai ki ho chāra-sāz koī

agar ek baar thamtā to hazār baar hotā

tumheñ naaz ho na kyuuñ kar ki liyā hai 'dāġh' kā dil

ye raqam na haath lagtī na ye iftiḳhār hotā

'ajab apna haal hota jo visal-e-yar hota

kabhi jaan sadqe hoti kabhi dil nisar hota

koi fitna ta-qiyamat na phir aashkar hota

tere dil pe kash zalim mujhe iKHtiyar hota

jo tumhaari tarah tum se koi jhuTe wada karata

tumhin munsifi se kah do tumhein e'tibar hota

ye maza tha dil lagi ka ki barabar aag lagti

na tujhe qarar kar hota na mujhe qarar hota

tere wade par sitam-gar abhi aur sabr karte

hamein apni zindagi ka agar e'tibar hota

ye wo dard-e-dil nahin hai ki ho chaara-saz koi

agar ek bar thamta to hazar bar hota

tumhein naz ho na kyun kar ki liya hai 'dagh' ka dil

ye raqam na hath lagti na ye iftiKHar hota