dard rukta nahin ek pal bhi ishq ki ye saza mil rahi hai

dard ruktā nahīñ ek pal bhī 'ishq kī ye sazā mil rahī hai

maut se pahle hī mar ga.e ham choT nazroñ kī aisī lagī hai

be-vafā itnā ehsān kar de kam se kam 'ishq kī laaj rakh le

do qadam chal ke kāñdhā to de-de tere 'āshiq kī mayyat uThī hai

raat kaTtī hai gin-gin ke taare niiñd aatī nahīñ ek pal bhī

aañkh lagtī nahīñ ab hamārī aañkh us but se aisī lagī hai

is qadar mere dil ko nichoḌā ek qatra lahū kā na chhoḌā

jagmagātī hai jo un kī ḳhalvat vo mire ḳhuun kī raushnī hai

laḌkhaḌātā huā jab bhī 'nāzāñ' un kī rañgīn mahfil meñ pahuñchā

dekh kar mujh ko logoñ se bole ye vahī be-vafā aadmī hai

dard rukta nahin ek pal bhi 'ishq ki ye saza mil rahi hai

maut se pahle hi mar gae hum choT nazron ki aisi lagi hai

be-wafa itna ehsan kar de kam se kam 'ishq ki laj rakh le

do qadam chal ke kandha to de-de tere 'ashiq ki mayyat uThi hai

raat kaTti hai gin-gin ke tare nind aati nahin ek pal bhi

aankh lagti nahin ab hamari aankh us but se aisi lagi hai

is qadar mere dil ko nichoDa ek qatra lahu ka na chhoDa

jagmagati hai jo un ki KHalwat wo mere KHun ki raushni hai

laDkhaData hua jab bhi 'nazan' un ki rangin mahfil mein pahuncha

dekh kar mujh ko logon se bole ye wahi be-wafa aadmi hai