dil liya iman liya aur be-sar-o-saman kiya

dil liyā īmāñ liyā aur be-sar-o-sāmāñ kiyā

ye merā kaisā bharā ghar ishq ne vīrāñ kiyā

ye ḳhudā kī maslahat us kī shikāyat kyā kareñ

dī butoñ ko us ne dānā.ī hameñ nādāñ kiyā

diin aur duniyā ke jhagḌe se jo dī mujh ko najāt

ye baḌā ai hazrat-e-ishq aap ne ehsāñ kiyā

āshiqoñ ko phir qazā aa.ī qayāmat ho ga.ī

phir samand-e-nāz ko us turk ne jaulāñ kiyā

dekhiye rahtī hai kal maqtal meñ kis kī aabrū

aaj phir saffāk ne hai nīmcha barañ kiyā

aur 'aughat' kyā thā mere paas jo kartā nisār

hazrat-e-'vāris' ke sadqe diin aur īmāñ kiyā

dil liya iman liya aur be-sar-o-saman kiya

ye mera kaisa bhara ghar ishq ne viran kiya

ye KHuda ki maslahat us ki shikayat kya karen

di buton ko us ne danai hamein nadan kiya

din aur duniya ke jhagDe se jo di mujh ko najat

ye baDa ai hazrat-e-ishq aap ne ehsan kiya

aashiqon ko phir qaza aai qayamat ho gai

phir samand-e-naz ko us turk ne jaulan kiya

dekhiye rahti hai kal maqtal mein kis ki aabru

aaj phir saffak ne hai nimcha baran kiya

aur 'aughat' kya tha mere pas jo karta nisar

hazrat-e-'waris' ke sadqe din aur iman kiya