dil ne hamare baiThe-baiThe kaise-kaise rog lagae

dil ne hamāre baiThe-baiThe kaise-kaise rog lagā.e

tum ne kisī kā naam liyā aur āñkhoñ meñ apnī aañsū aa.e

jitnī zabāneñ utne qisse apnī udāsī ke kāran

lekin log abhī tak ye saada sī pahelī buujh na paa.e

'ishq kiyā hai kis se kiyā hai kab se kiyā hai kaise kiyā hai

logoñ ko ik baat milī apne ko to lekin ronā aa.e

raah meñ yuuñ hī chalte-chalte un kā dāman thaam liyā thā

ham un se kuchh māñgeñ chāhe ham se to ye sochā bhī na jaa.e

najm-e-sahar ke chehre se 'inshā' itnī bhī ummīdeñ na lagāo

aisā bhī ham ne dekhā hai aksar raat kaTe aur sub.h na aa.e

dil ne hamare baiThe-baiThe kaise-kaise rog lagae

tum ne kisi ka nam liya aur aankhon mein apni aansu aae

jitni zabanen utne qisse apni udasi ke karan

lekin log abhi tak ye sada si paheli bujh na pae

'ishq kiya hai kis se kiya hai kab se kiya hai kaise kiya hai

logon ko ek baat mili apne ko to lekin rona aae

rah mein yun hi chalte-chalte un ka daman tham liya tha

hum un se kuchh mangen chahe hum se to ye socha bhi na jae

najm-e-sahar ke chehre se 'insha' itni bhi ummiden na lagao

aisa bhi hum ne dekha hai aksar raat kaTe aur subh na aae