dil wahi hai jis mein wo dildar hai

dil vahī hai jis meñ vo dildār hai

aañkh vo hai jis meñ rū-e-yār hai

tālib-e-dīdār se parda nahīñ

kyuuñ hijāb-e-ruḳh naqāb-e-yār hai

hai ḳhatā us riñd kā mast-e-alast

jo sharāb-e-ishq kā sarshār hai

rañg-e-gul phīkā hai jis ke sāmne

itnā rañgīñ yaar kā ruḳhsār hai

DhūñDte haiñ kis ko sab ahl-e-talab

vo to ham sab ke gale kā haar hai

yā-ḳhudā 'akbar' kī kashtī ko nikāl

tū hī is beḌe kā khevan-hār hai

dil wahi hai jis mein wo dildar hai

aankh wo hai jis mein ru-e-yar hai

talib-e-didar se parda nahin

kyun hijab-e-ruKH naqab-e-yar hai

hai KHata us rind ka mast-e-alast

jo sharab-e-ishq ka sarshaar hai

rang-e-gul phika hai jis ke samne

itna rangin yar ka ruKHsar hai

DhunDte hain kis ko sab ahl-e-talab

wo to hum sab ke gale ka haar hai

ya-KHuda 'akbar' ki kashti ko nikal

tu hi is beDe ka khewan-haar hai