do din ki tan-asani ke liye taqdir ka shikwa kaun kare

do din kī tan-āsānī ke liye taqdīr kā shikvā kaun kare

rahnā hī nahīñ jab duniyā meñ duniyā kī tamannā kaun kare

is oT meñ sab kuchh karte ho dāman bhī bachā.e rahte ho

ilzām bhī ham par dharte ho gar ham na hoñ parda kaun kare

vo baat hamāre bas kī thī ye kaam hamāre bas kā nahīñ

tashkīl-e-tamannā to kar lī takmīl-e-tamannā kaun kare

but-sāzī-e-vahm-o-kHayāl sahī taskīn kī sūrat to niklī

duniyā ko jatā ke fareb-e-nazar sharminda-o-rusvā kaun kare

ḳhūñ-rez hai jis kā har ġhamza parde se vahī qātil niklā

hairat meñ duniyā mahshar hai khaḌī ab ḳhuun kā da.ava kaun kare

'mahmūd' na tum majbūr karo hasrat meñ kisī kī marne do

ikHfā-e-mohabbat meñ haiñ maze iz.hār-e-tamannā kaun kare

do din ki tan-asani ke liye taqdir ka shikwa kaun kare

rahna hi nahin jab duniya mein duniya ki tamanna kaun kare

is oT mein sab kuchh karte ho daman bhi bachae rahte ho

ilzam bhi hum par dharte ho gar hum na hon parda kaun kare

wo baat hamare bas ki thi ye kaam hamare bas ka nahin

tashkil-e-tamanna to kar li takmil-e-tamanna kaun kare

but-sazi-e-wahm-o-kHayal sahi taskin ki surat to nikli

duniya ko jata ke fareb-e-nazar sharminda-o-ruswa kaun kare

KHun-rez hai jis ka har ghamza parde se wahi qatil nikla

hairat mein duniya mahshar hai khaDi ab KHun ka dawa kaun kare

'mahmud' na tum majbur karo hasrat mein kisi ki marne do

ikHfa-e-mohabbat mein hain maze izhaar-e-tamanna kaun kare