duniya pe bharosa karata hai nadan kahin dhoka hoga

duniyā pe bharosa karatā hai nādān kahīñ dhoka hogā

ik chaltī phirtī chhāoñ hai ye ma.alūm nahīñ kal kyā hogā

hai fikr-e-ma.āl-e-ishq abas ye soch ġhalat hai kyā hogā

jab dar pe kisī ke baiTh chuke ab jo kuchh bhī hogā hogā

ḳhud tujhko jahāñ jalnā hai vahāñ dāman ko bachā.egā kab tak

ye ishq ke sho.ale haiñ unmeñ jal jal ke maze lenā hogā

ai chārāgār-e-kHush-fahm zarā kuchh aql kī le kuchh hosh kī le

bīmār-e-mohabbat bhī tujh se nādān kahīñ achchhā hogā

har chiiz kā ik haq hotā hai kuchh husn kā haq kuchh ishq kā haq

duniyā-e-mohabbat meñ tujhko har ek kā haq denā hogā

mailān-e-tabī.at hī Thahrā ho jaa.e jidhar bhī ho jaa.e

vo kHud-sar-o-kHud-bīñ ḳhud-ārā ye kis ko ḳhabar kis kā hogā

hai ḳhaak bhī jiske kūche kī iksīr-e-mokammal ai 'kāmil'

andāzā lagā lo ab us kā barbād-e-mohabbat kyā hogā

duniya pe bharosa karata hai nadan kahin dhoka hoga

ek chalti phirti chhaon hai ye malum nahin kal kya hoga

hai fikr-e-maal-e-ishq abas ye soch ghalat hai kya hoga

jab dar pe kisi ke baiTh chuke ab jo kuchh bhi hoga hoga

KHud tujhko jahan jalna hai wahan daman ko bachaega kab tak

ye ishq ke shoale hain unmen jal jal ke maze lena hoga

ai chaaragar-e-kHush-fahm zara kuchh aql ki le kuchh hosh ki le

bimar-e-mohabbat bhi tujh se nadan kahin achchha hoga

har chiz ka ek haq hota hai kuchh husn ka haq kuchh ishq ka haq

duniya-e-mohabbat mein tujhko har ek ka haq dena hoga

mailan-e-tabiat hi Thahra ho jae jidhar bhi ho jae

wo kHud-sar-o-kHud-bin KHud-ara ye kis ko KHabar kis ka hoga

hai KHak bhi jiske kuche ki iksir-e-mokammal ai 'kaamil'

andaza laga lo ab us ka barbaad-e-mohabbat kya hoga