main kuchh nahin magar ye haqiqat zarur hai

maiñ kuchh nahīñ magar ye haqīqat zarūr hai

aap ke dar-e-karam se mohabbat zarūr hai

ye aur baat aa.e na ādāb-e-bandagī

lekin aap ke dar se 'aqīdat zarūr hai

kaasa meñ mujh faqīr ke kuchh bhī nahīñ magar

lekin aap ke 'ishq kī daulat zarūr hai

mujh be-navā ke vāste ye bhī to kam nahīñ

hāthoñ meñ un kā dāman-e-nisbat zarūr hai

maanā navāzishāt ke qābil nahīñ huuñ maiñ

phir bhī kisī kī mujh pe 'ināyat zarūr hai

jalve hazār sāmne aate raheñ to kyā

āñkhoñ pe farz un kī ziyārat zarūr hai

aa.ī na ġham kī dhuup kabhī mujh pe ai 'fanā'

sar pe kisī kā dāman-e-rahmat zarūr hai

main kuchh nahin magar ye haqiqat zarur hai

aap ke dar-e-karam se mohabbat zarur hai

ye aur baat aae na aadab-e-bandagi

lekin aap ke dar se 'aqidat zarur hai

kasa mein mujh faqir ke kuchh bhi nahin magar

lekin aap ke 'ishq ki daulat zarur hai

mujh be-nawa ke waste ye bhi to kam nahin

hathon mein un ka daman-e-nisbat zarur hai

mana nawazishat ke qabil nahin hun main

phir bhi kisi ki mujh pe 'inayat zarur hai

jalwe hazar samne aate rahen to kya

aankhon pe farz un ki ziyarat zarur hai

aai na gham ki dhup kabhi mujh pe ai 'fana'

sar pe kisi ka daman-e-rahmat zarur hai