dard-e-dil had se jo guzra to masiha nikla

dard-e-dil had se jo guzrā to masīhā niklā

merī sūrat meñ tire husn kā parda niklā

dekh kar mujh ko farishtoñ ne paḌhā kalma-e-haq

jazba-e-ishq kā anjām ye kaisā niklā

'ishq-e-kāmil se miTī rañg doī kī hujjat

mere naqshe meñ mire yaar kā naqsha niklā

haram-o-dair meñ jā kar bhī tasallī na huī

ham jise jalva samajhte the vo parda niklā

jādā-e-’ishq meñ ye aa.ī hai kaisī manzil

vo tamāshā.ī banā aur maiñ tamāshā niklā

miT ga.ī dil se talab ka.aba-o-but-ḳhāne kī

merī manzil jo tirā naqsh-e-kaf-e-pā niklā

sañg-e-dar aap kā paanā to bahut mushkil hai

aap kā naqsh-e-qadam hī mirā kā'ba niklā

ai 'fanā' ab na kinārā hai na kashtī hai na mauj

maiñ kahāñ ġharq huā aur kahāñ jā niklā

dard-e-dil had se jo guzra to masiha nikla

meri surat mein tere husn ka parda nikla

dekh kar mujh ko farishton ne paDha kalma-e-haq

jazba-e-ishq ka anjam ye kaisa nikla

'ishq-e-kaamil se miTi rang doi ki hujjat

mere naqshe mein mere yar ka naqsha nikla

haram-o-dair mein ja kar bhi tasalli na hui

hum jise jalwa samajhte the wo parda nikla

jada-e-’ishq mein ye aai hai kaisi manzil

wo tamashai bana aur main tamasha nikla

miT gai dil se talab kaba-o-but-KHane ki

meri manzil jo tera naqsh-e-kaf-e-pa nikla

sang-e-dar aap ka pana to bahut mushkil hai

aap ka naqsh-e-qadam hi mera ka'ba nikla

ai 'fana' ab na kinara hai na kashti hai na mauj

main kahan gharq hua aur kahan ja nikla