دردِ دل حد سے جو گزرا تو مسیحا نکلا

دردِ دل حد سے جو گزرا تو مسیحا نکلا

میری صورت میں، ترے حسن کا پردہ نکلا

دیکھ کر مجھ کو فرشتوں نے پڑھا کلمۂ حق

جذبۂ عشق کا انجام یہ کیسا نکلا

عشقِ کامل سے مٹی رنگِ دوئی کی حجت

میرے نقشے میں، مرے یار کا نقشہ نکلا

حرم و دیر میں جا کر بھی تسلی نہ ہوئی

ہم جسے جلوہ سمجھتے تھے، وہ پردہ نکلا

جادۂ عشق میں یہ آئی ہے کیسی منزل

وہ تماشائی بنا اور میں تماشا نکلا

مٹ گئی دل سے طلب کعبہ و بت خانے کی

میری منزل جو ترا نقشِ کفِ پا نکلا

سنگِ در آپ کا پانا تو بہت مشکل ہے

آپ کا نقشِ قدم ہی مرا کعبہ نکلا

اے فناؔ اب نہ کنارا ہے، نہ کشتی ہے، نہ موج

میں کہاں غرق ہوا اور کہاں جا نکلا