jo dhaDkan ki sada ko naghma-e-manzil nahin samjha

jo dhaḌkan kī sadā ko naġhma-e-manzil nahīñ samjhā

mohabbat karne vaale to maqām-e-dil nahīñ samjhā

usī kotāhī ne karvā.ī un kī justujū mujh se

maiñ har mahfil ko apne yaar kī mahfil nahīñ samjhā

samā.e jis kī nazroñ meñ tajassus miT gayā us kā

use dar-dar phirāyā jis ko us qābil nahīñ samjhā

ye kyā andāz hai kaisā tajāhul-e-'ārifāna hai

lagā kar zaḳhm dil ko vo mujhe bismil nahīñ samjhā

thā mauj-e-dard meñ paiġhām-e-vasl-e-yār kyā kahiye

vahīñ thā dāman-e-sāhil jahāñ sāhil nahīñ samjhā

'fanā' DhūñDā jahāñ meñ un ko dil se be-ḳhabar ho kar

yahī to merī manzil thī jise manzil nahīñ samjhā

jo dhaDkan ki sada ko naghma-e-manzil nahin samjha

mohabbat karne wale to maqam-e-dil nahin samjha

usi kotahi ne karwai un ki justuju mujh se

main har mahfil ko apne yar ki mahfil nahin samjha

samae jis ki nazron mein tajassus miT gaya us ka

use dar-dar phiraya jis ko us qabil nahin samjha

ye kya andaz hai kaisa tajahul-e-'arifana hai

laga kar zaKHm dil ko wo mujhe bismil nahin samjha

tha mauj-e-dard mein paigham-e-wasl-e-yar kya kahiye

wahin tha daman-e-sahil jahan sahil nahin samjha

'fana' DhunDa jahan mein un ko dil se be-KHabar ho kar

yahi to meri manzil thi jise manzil nahin samjha