nazar mein bas gae ho tum to chhup jaane se kya hoga

nazar meñ bas ga.e ho tum to chhup jaane se kyā hogā

koī parda nahīñ ab parda dīvāne se kyā hogā

kalīsā meñ haram meñ dair meñ jaane se kyā hogā

karam hogā na jab tak un kā dīvāne se kyā hogā

mazā jab hai ki dam nikle tumhāre āstāne par

tumhārī yaad meñ be-maut mar jaane se kyā hogā

charāġh-e-husn ban kar 'ishq kī rāheñ sajā diije

akele manzil-e-ulfat meñ kho jaane se kyā hogā

dil-e-nādāñ na aa.e haath meñ gar yaar kā dāman

junūn-e-'ishq meñ dīvāna ban jaane se kyā hogā

tamannā hai agar us kī to us ke naam pe miT jā

talāsh-e-yār meñ yuuñ Thokareñ khāne se kyā hogā

'fanā' ye soch kar us ke karam se lau lagā.ī hai

vahī kaam aa.egā mere kahīñ jaane se kyā hogā

nazar mein bas gae ho tum to chhup jaane se kya hoga

koi parda nahin ab parda diwane se kya hoga

kalisa mein haram mein dair mein jaane se kya hoga

karam hoga na jab tak un ka diwane se kya hoga

maza jab hai ki dam nikle tumhaare aastane par

tumhaari yaad mein be-maut mar jaane se kya hoga

charagh-e-husn ban kar 'ishq ki rahen saja dije

akele manzil-e-ulfat mein kho jaane se kya hoga

dil-e-nadan na aae hath mein gar yar ka daman

junun-e-'ishq mein diwana ban jaane se kya hoga

tamanna hai agar us ki to us ke nam pe miT ja

talash-e-yar mein yun Thokaren khane se kya hoga

'fana' ye soch kar us ke karam se lau lagai hai

wahi kaam aaega mere kahin jaane se kya hoga